ھەولێر – AA
ئەمڕۆ دووشەممە، یەکەم یاری قۆناغی پێش کۆتایی پاڵەوانێتی "٢٥مین جامی کەنداوی عەرەبی" ئەنجام دەدرێت کە لە میانیدا ھەڵبژاردەی عێراق و ھەڵبژاردەی قەتەر رووبەڕوو یەکتر دەبنەوە.
کاتژمێر ١٦:١٥ بەکاتی ھەولێر لە یەکەم یاری قۆناغی پێش کۆتایی پاڵەوانێتی "٢٥مین جامی کەنداو"، ھەڵبژاردەی عێراق و ھەڵبژاردەی قەتەر لە یاریگای نێودەوڵەتیی بەسرە رووبەڕووی یەکتر دەبنەوە.
ھەڵبژاردەی عێراق چاوی لەوەیە بگاتە یاریی کۆتایی پاڵەوانێتییەکە، بەو پێیەی لە یاریگای نێوەدەڵەتیی بەسرە لەبەردەم ٦٥ ھەزار ھاندەردا بەرامبەر بە ھەڵبژاردەی قەتەر یاری دەکات.
ھەروەھا بە بڕیاری پارێزگاری بەسرە، ئەسعەد عیدانی ئەمڕۆ لە پارێزگای بەسرە کراوەتە پشوو، بۆ ئەوەی زۆرترین ھاندەر ئامادەی یارییەکە بن، ئەوەیش بە ئامانجی پاڵپشتیکردن لە ھەڵبژاردەی عێراق.
ھەروەها سبەی سێشەممە کاتژمێر ١٦:١٥ بەکاتی ھەولێر یاری دووەمی قۆناغی پێش کۆتایی پاڵەوانێتی "٢٥مین جامی کەنداو " لەنێوان ھەڵبژاردەی بەحرێن و ھەڵبژاردەی سوڵتانشینی عومان لە یاریگای مینا ئەنجام دەدرێت.
براوەی یاریییەکانی قۆناغی پێش کۆتایی پاڵەوانێتی "٢٥مین جامی کەنداو" رۆژی ١٩ی ئەم مانگە لە یاریی کۆتایی پاڵەوانێتییەکەدا لە یاریگای نێودەوڵەتیی بەسرە رووبەڕووی یەکتر دەبنەوە.
