دۆناڵد ترەمپ ھەڕەشەی لەناوبردنی ئێرانی کرد ئەگەر ھەوڵی کوشتنی بدات

ئەنقەرە ــ AA

سەرۆکی ئەمریکا، دۆناڵد ترەمپ ڕایگەیاند ڕێنمایی زۆر یەکلاکەرەوەی دەرکردووە بۆ لەناوبردنی ئێران لەسەر ڕووی زەوی، ئەگەر ھەوڵی جێبەجێکردنی ھەڕەشەکانی بۆ کوشتنی بدات.

دۆناڵد ترەمپ لە دیمانەیەکدا لەگەڵ " NewsNation" باسی لە پرسە ناوخۆیی و دەرەکییەکان کرد.

سەرۆکی ئەمریکا، دۆناڵد ترەمپ لەبارەی ئەگەری ئەوەی ئێران ھەڕەشەکانی بۆ کوشتنی جێبەجێ بکات، ئەوە گوتی: " ئەگەر ھەر شتێک ڕووبدات، ھەموو وڵات دەتەقێتەوە، بەدڵنیاییەوە بە ھێزێکی زۆر توند لێیان دەدەم".

ڕاشیگەیاند کە ڕێنمایی زۆر یەکلاکەرەوەی لەوبارەیەوە دەرکردووە و گوتی: " ئەگەر شتێک ڕووبدات، ئەوە ئێران لەسەر ڕووی زەوی بوونی نامێنێت".