سەرکۆماری ئازەربایجان پێشوازی لە وەزیری دەرەوەی تورکیا کرد

باکو- AA

سەرکۆماری ئازەربایجان، ئیلهام عەلیێڤ لە باکو-ی پایتەخت پێشوازی لە وەزیری دەرەوەی تورکیا، مەولود چاوشئۆغڵو کرد.

ئیلهام عەلیێڤ لە گوتاری پێشوازیکردندا، باسی لە ئۆپەراسیۆنی سوپای ئازەربایجان بۆ رزگارکردنی خاکە داگیرکراوەکان کرد و ئاماژەی بەوەدا کە سەرۆکی ئەرمینیا، نیکۆل پاشینیان نامەی بۆ سەرۆکی رووسیا، ڤلادیمیر پۆتین ناردووە و داوای یارمەتی لێکردووە.

سەرکۆماری ئازەربایجان لە بارەی چارەسەرکردنی پرسی ناوچەی قەرەباغ گوتی: "باشترین بژاردە ئەوەیە کە ئەرمینیا شکستی خۆی رابگەیەنێت و لە خاکی وڵاتەکەمان بکشێتەوە و کێشەکە لەسەر مێزی گفتوگۆ چارەسەر بکرێت".

ئیلهام عەلیێڤ سوپاسی پشتیوانییەکانی حکوومەت و گەلی تورکیا-ی کرد و جەختی لەوە کردەوە کە میدیا تورکییەکان جارێکی دیکە یەکێتی ئازەربایجان و تورکیایان نیشاندایەوە.

لە بەرامبەردا وەزیری دەرەوەی تورکیا، مەولود چاوشئۆغڵو ئەوەی ئاشکرا کرد کە لەسەر فەرمانی سەرکۆمار، رەجەب تەیب ئەردۆغان هاتووەتە ئازەربایجان و گوتی: "سەرکۆمارمان فەرمانی پێکردوین کە ئازەربایجان-ی دۆست تەنها جێنەهێڵین، سەربەرزین بە سەرکەوتنەکانتان، بەڕاستی ئێوە هێزی تورکتان نیشانی جیهان دا."

مەولود چاوشئۆغلو ئەوەشی خستەڕوو کە حکوومەتی ئەنقەرە لە نزیکەوە چاودێری پێکدادانەکانی ناوچەی قەرەباغ دەکات و ستایشی هەڵوێستی ئازەربایجانی کرد بەرامبەر چارەسەرکردنی پرسەکە لە رێگای دانوستانەوە.