فەڕەنسا.. خۆپیشاندان دژبە توندوتیژییەکانی پۆلیس

پاریس- AA

لە پاریسی پایتەختی فەڕەنسا، بەهۆی دەنگۆی گیانلەدەستدانی کەسێک بەهۆی توندوتیژی پۆلیسەوە، خۆپیشاندان و ناڕەزایی دروست بوو.

لە خۆپیشاندانەکەدا، پێکداهەڵپژان لەنێوان هێزەکانی پۆلیس و خۆپیشاندەراندا، دروست بوو.

خۆپیشاندەران لەڕێی فیشەکەشێتە و سووتاندنی تەنەکەخۆڵ و وێستگەکانی پاسەوە ناڕەزایی خۆیان دەربڕی و هێزەکانی پۆلیسیش بە گازی فرمێسکڕێژ بڵاوەیان بە گردبوونەوەکە کرد.

شەوی رابردوو، ماتۆڕسوارێکی تەمەن ١٨ ساڵ بەهۆی خۆکێشانی بە ستوونێکی کارەباوە بە سەختی برینداربوو و بەهۆی سەختی برینەکەیەوە لە نەخۆشخانە گیانی لەدەست دا. شایەتحاڵانی رووداوەکە لە لێدوانیاندا بۆ راگەیاندنەکانی فەڕەنسا باسیان لەوە کردبوو ئۆتۆمبێلێکی پۆلیس رێگای لە گەنجەکە گرتووە و خۆی پیادا کێشاوە.

ئاسایشی فەڕەنساش لە روونکردنەوەیەکدا، ئەوەی خستەڕوو کە هیچ کەسێک رێگای بە گەنجەکە نەگرتووە.

مانگی رابردووش بەبانگەشەی ئەوەی هێزەکانی پۆلیس ماتۆڕسوارێکیان بریندارکردووە، خۆپیشاندان و ناڕەزایی دروست بووبوو و لە خۆپیشاندانەکانیشدا پێکداهەڵپژان روویدابوو.