كۆنگره‌ی رۆژنامه‌وانیی نێچیرڤان بارزانی و وه‌زیری ده‌ره‌وه‌ی هۆڵه‌ندا

هه‌ولێر - AA
وه‌زیری ده‌ره‌وه‌ی هۆڵه‌ندا، ستیڤ بلۆك له‌ كۆنگره‌یه‌كی رۆژنامه‌وانییدا له‌گه‌ڵ سه‌رۆكوه‌زیرانی هه‌رێمی كوردستان، نێچیرڤان بارزانی رایگه‌یاند، وڵاته‌كه‌ی چاوه‌ڕێی به‌هێزكردنی په‌یوه‌ندییه‌كانیه‌تی له‌گه‌ڵ عێراق و هه‌رێمی كوردستان.
به‌یانی ئه‌مڕۆ سێشه‌ممه‌، وه‌زیری ده‌ره‌وه‌ی هۆڵه‌ندا، ستیڤ بلۆك كه‌ دوێنێ ئێواره‌ له‌ به‌غداوه‌ گه‌یشته‌ هه‌رێمی كوردستان له‌ لایه‌ن سه‌رۆكوه‌زیرانی هه‌رێمی كوردستان، نێچیرڤان بارزانی-یه‌وه‌ پێشوازی لێكرا.

له‌ كۆنگره‌یه‌كی رۆژنامه‌وانیی هاوبه‌شدا كه‌ له‌ شوێنی مانه‌وه‌ی نێچیرڤان بارزانی له‌ هه‌ولێر سازكرا سه‌رۆكوه‌زیرانی هه‌رێمی كوردستان روونیكرده‌وه‌ "په‌یوه‌ندییه‌كانی نێوان هه‌رێمی كوردستان و هۆڵه‌ندا له‌ ئاستێكی باشدایه‌ و له‌ ماوه‌ی رابردوودا چه‌ندین جار چاومان به‌جه‌نابی سه‌رۆكوه‌زیرانی هۆڵه‌ندا كه‌وتووه‌ و به‌ڕێزیان سه‌ردانی هه‌رێمی كوردستانی كردووه‌، سوپاسی هاریكاری و هاوكارییه‌كانی هۆڵه‌ندا بۆ هه‌رێمی كوردستان له‌ شه‌ڕی داعش و بوونی هێزه‌كانیان له‌ هه‌رێمی كوردستان بۆ مه‌شقپێكردنی پێشمه‌رگه‌ ده‌كه‌ین، سوپاسی هاوكارییه‌كانی حكوومه‌ت و رێكخراوه‌ ناحكومییه‌كانی هۆڵه‌ندا ده‌كه‌ین بۆ گه‌یاندنی هاوكاری بۆ ئاواره‌ و په‌نابه‌ران له‌ كه‌مپه‌كانی هه‌رێمی كوردستان چی راسته‌وخۆ بێت یان له‌ رێگه‌ی یه‌كێتیی ئه‌ورووپاوه‌ بێت".

نێچیرڤان بارزانی له‌ قسه‌كانیشدا داوای له‌ هۆڵه‌ندا كرد "له‌ سێكته‌ری خۆراك و كشتوكاڵدا هاوكاری هه‌رێمی كوردستان بكات كه‌ له‌م بواره‌دا خاوه‌ن ئه‌زموونێكی ده‌وڵه‌مه‌نده‌".

سه‌رۆكوه‌زیرانی هه‌رێمی كوردستان، نێچیرڤان بارزانی له‌و كۆنگره‌ رۆژنامه‌وانییه‌دا كه‌ ئاژانسی ئانادۆڵو ده‌یگواسته‌وه‌ گوتیشی: "له‌م دانیشتنه‌ماندا باسمان له‌ په‌یوه‌ندییه‌كانی نێوان هه‌ولێر و به‌غدا كرد كه‌ چاوه‌ڕوان ده‌كرێت له‌ كابینه‌ی ئێستای حكوومه‌تی عێراق په‌یوه‌ندییه‌كان زیاتر به‌ره‌و پێشه‌وه‌ بچن، باسمان له‌ پڕۆسه‌ی سیاسیی عێراق و دروستكردنی كابینه‌ی نوێی حكوومه‌تی هه‌رێمی كوردستان كردووه‌، جه‌خت له‌ به‌ره‌وپێشبردنی زیاتری په‌یوه‌ندییه‌كان كرا تا له‌ گشت بواره‌كان هه‌ماهه‌نگی زیاتر بێت به‌تایبه‌ت له‌ بواره‌كانی ئابووری، بازرگانی و خوێندن".
هه‌روەها گوتیشی: "سوپاسی باڵیۆزخانه‌ی هۆڵه‌ندا له‌ به‌غدا و كۆنسولخانه‌ی گشتی هۆڵه‌ندا له‌ هه‌ولێر ده‌كه‌ین بۆ ئه‌و هه‌ماهه‌نگی و هاوكارییه‌ی له‌گه‌ڵ حكوومه‌تی هه‌رێمی كوردستان و داموده‌زگاكان هه‌یانه‌ كه‌ رۆڵیان له‌ پێشخستنی په‌یوه‌ندیی دووقۆڵی هه‌بووه‌، خۆشحاڵین كه‌ هۆڵه‌ندا له‌ چوارچێوه‌ی سیاسه‌تی خۆیدا، عێراق و هه‌رێمی كوردستانی له‌پێشینه‌ داناوه‌ بۆ به‌ره‌وپێشبردنی په‌یوه‌ندییه‌كان".
له‌ كۆتایی قسه‌كانیدا سه‌رۆكوه‌زیرانی هه‌رێمی كوردستان گوتی: "خۆشحاڵن كه‌ بۆ پته‌وكردنی په‌یوه‌ندییه‌كانی هه‌رێمی كوردستان و هۆڵه‌ندا كه‌رتی تایبه‌تی هه‌رێمی كوردستان له‌ ئاینده‌دا سیمینارێك له‌ هۆڵه‌ندا سازده‌كه‌ن. هه‌روه‌ها سه‌رباری ئه‌وه‌ی ئاماژه‌ی بۆ ئه‌وه‌كرد باسیان له‌ پێشهات و په‌ره‌سه‌ندنه‌كانی رۆژهه‌ڵاتی ناوه‌ڕاست كردووه‌، نێچیرڤان بارزانی ئومێدی ئه‌وه‌ی بۆ وه‌زیری ده‌ره‌وه‌ی هۆڵه‌ندا كرد كه‌ گه‌شته‌كه‌ی بۆ عێراق و هه‌رێمی كوردستان "پڕ ده‌ستكه‌وت" بێت.

وه‌زیری ده‌ره‌وه‌ی هۆڵه‌ندا، ستیڤ بلۆك له‌و كۆنگره‌ رۆژنامه‌وانییه‌دا له‌گه‌ڵ نێچیرڤان بارزانی رایگه‌یاند "په‌یوه‌ندییه‌كی زۆر پته‌و له‌ نێوان هه‌رێمی كوردستان و هۆڵه‌ندا هه‌یه‌، هۆڵه‌ندا یه‌كه‌م وڵاته‌ ئه‌ورووپا بووه‌ كه‌ ئاواره‌ كوردییه‌كانی وه‌رگرتووه‌ و زیاتر له‌ سێ هه‌زار په‌نابه‌ری كورد له‌ هۆڵه‌ندا هه‌یه‌ و چاوه‌ڕێی به‌هێزكردنی په‌یوه‌ندییه‌كانمانین له‌گه‌ڵ عێراق و هه‌رێمی كوردستان، له‌بواری سه‌قامگیری و كۆچ و هه‌روه‌ها ئابووریش له‌ ئاینده‌دا ده‌مانه‌وێت په‌یوه‌ندیی بازرگانیی پته‌وتر بكه‌ین".

له‌درێژه‌ی قسه‌كانیدا گوتی: "پشتگیری له‌ هه‌رێمی كوردستانی به‌هێز له‌نێو عێراقێكی به‌هێزدا ده‌كه‌ین".

ستیڤ بلۆك له‌ درێژه‌ی قسه‌كانیدا له‌و كۆنگره‌ رۆژنامه‌وانییه‌دا گوتیشی: "راوێژكاره‌ سه‌ربازییه‌كانمان به‌رده‌وام ده‌بن له‌ راهێنانی هێزه‌كانی پێشمه‌رگه‌ و دووپاتمان كردووه‌ته‌وه‌ كه‌ پێویسته‌ گرنگی به‌ كه‌مه‌ نه‌ته‌وه‌كان بدرێت له‌ عێراق و هه‌رێمی كوردستان و چاوه‌ڕوانی ئه‌وه‌ین په‌یوه‌ندییه‌كانی نێوان هه‌رێمی كوردستان و عێراق پته‌وتربێت".