هەنگاوی یەكەمی كۆنترۆڵكردنەوەی مووسڵ تەواو بوو

بە گوتەی بەرپرسێكی ئەمنی عێراق، هێزەكانی ئەمنی كۆتاییان بە یەكەم هەنگاوی پڕۆسەی "فەتح" هێنا كە ئەمڕۆ بۆ كۆنترۆڵكردنەوەی ناوچەکانی دەورووبەری مووسڵ لە ژێر دەستی چەكدارانی داعش دەستیان پێكرد و بەرپرسەكە دەشڵێت، ئەو پڕۆسەیە بە گرتنەوەی 11 گوند لە بەرەی چەپی شارەكە كۆتایی هات.

سەرۆكی لیژنەی ئەمنی لە ئەنجوومەنی پارێزگای نەینەوا محەمەد ئیبراهیم زانیاری زیاتری لەمبارەیەوە دایە ئاژانسی ئانادۆڵو و گوتی: "هەنگاوی یەكەم لە پڕۆسەی سەربازیی "فەتح" كە بەیانی ئەمڕۆ هێزەكانی ئەمنی بۆ كۆنترۆڵكردنەوەی ناوچەکانی دەرورووبەری مووسڵ دەستیان پێكرد، پاش نیوەڕۆی ئەمڕۆ بە گرتنەوەی 11 گوند لە بەرەی چەپی شارەكە كۆتایی هات".

ئیبراهیم دەشڵێت، پڕۆسەكە زۆر بە خێرا تەواوبوو كە بەهۆیەوە چەكدارانی داعش لەو 11 گوند هەڵهاتن كە رزگاركراونەوە و لە ئێستاشدا، پڕۆسەی هەڵگرتنەوەی مین كە چەكدارانی داعش لە سەر رێگەوبان و ماڵەكانی ئەو گوندانە چاندوویانە دەستی پێكردووە.

هێشتا زیانی گیانی شەڕ و پێكدادانی نێو پڕۆسە سەربازییەكە لە نێوان هێزەكانی ئەمنی و چەكدارانی داعش ئاشكرا نەبووە و رانەگەیەنراوە.

هاوكات لای خۆشییەوە پارێزگاری پێشووی نەینەوا ئەسیل نوجێفی ئاماژە بەوەدەكات، هێزەكانی حەشدی نیشتمانی كە لە دانیشتوانی شاری مووسڵ پێكهاتووە، بۆ بەشداری لە پڕۆسەی رزگاركردنی شارەكەیان ئامادەن.

لە بەیاننامەیەكدا، نوجێفی رایگەیاندووە، هێزەكانی حەشدی نیشتمانی لەوپەڕی ئامادەباشین تا رۆڵی خۆیان لە پڕۆسەی رزگاركردنی شاری مووسڵ ببینن و سەرجەم هێزەكانیش لە دەوروبەری شارەكە هەر یەك لە میحوەرێكەوە یەك دەگرن بۆ ئەوەی بتوانن پێكەوە دەست بە پڕۆسەی رزگاركردنی مووسڵ بكەن.

هاوكات هاوپەیمانی موتەحیدوون بەسەرۆكایەتی ئوسامە نوجێفی لە راگەیانراوێكدا كە وێنەیەكی بۆ ئاژانسی ئانادۆڵو هاتووە، داوا دەكات كەوا پێویستە پڕۆسەی رزگاركردنی مووسڵ، كەمترین زیان كۆتایی بێت و هێزەكانی بەشداربووی پڕۆسەكەش، هەوڵبدەن پارێزگاری لە گیانی هاووڵاتییان بكەن و دۆخی ئەو هاووڵاتییانە رەچاو بكەن.

بەرەیانی ئەمڕۆ پێنجشەممە، هەنگاوی یەكەم بۆ كۆنترۆڵكردنەوەی شاری مووسڵ لە ژێر ناوی پڕۆسەی "فەتح" لە سێ میحوەرەوە بە بەشداری هێزەكانی سوپای عێراق و حەشدی شەعبی بە فەرمانی فەرماندەیی ئۆپەڕاسیۆنەكانی نەینەوا و پشتیوانی هێزەكانی پێشمەرگە و هێزی هاوپەیمانان دەستی پێكرد.