پەیوەندی تەلەفۆنیی سەرکۆماری تورکیا و سەرۆکی ئیسرائیل

ئیستانبوڵ - AA

سەرکۆماری تورکیا، رەجەب تەیب ئەردۆغان پەیوەندییەکی تەلەفۆنیی لەگەڵ سەرۆکی ئیسرائیل، ئیسحاق هێرزۆگ ئەنجام دا.

بەپێی راگەیەندراوێکی فەرمانگەی پەیوەندییەکان لە سەرۆکایەتی کۆماری تورکیا لە پەیوەندییە تەلەفۆنییەکەدا، پەیوەندییەکانی تورکیا-ئیسرائیل و بابەتە هەرێمییەکان تاوتوێ کراون.

سەرکۆماری تورکیا ئەردۆغان ئاماژەی بەوە کرد کە پەیوەندییەکانی تورکیا-ئیسرائیل گرنگە لە رووی ئاسایش و سەقامگیری خۆرهەڵاتی ناوەڕاست و باسی لەوەیش کرد کە ئەگەر بە لێکتێگەیشتن بابەتە دووقۆڵیی و هەرێمییەکان تاوتوێ کران، ئەوا دەکرێت جیاوازی بۆچوونەکان بچووک بکرێنەوە.

ئەردۆغان جەختی کردەوە لەسەر دووبارە بەرقەرارکردنەوەی کولتووری ئاشتیی، خۆڕاگری و پێکەوەژیان لە ناوچەکەدا، هەروەها ئەوەشی خستەڕوو کە لەو رووەوە دەکرێت پەیوەندییەکانی فەڵەستین-ئیسرائیل پەرەی پێ بدرێت و پرۆسەی ئاشتیی سەرلەنوێ دەست پێ بکرێتەوە.

رەجەب تەیب ئەردۆغان هەروەها باسی لەوە کرد کە بەردەوامی دیدار و دیالۆگی نێوان تورکیا و ئیسرائیل بەرژەوەندی هاوبەشی هەیە.

- راگەیەندراوی ئیسرائیل

بەپێی راگەیەندراوێکی سەرۆکایەتی ئیسرائیل، سەرۆکی ئەو وڵاتە، ئیسحاق هێرزۆگ پەیوەندی کردووە بە سەرکۆماری تورکیا، رەجەب تەیب ئەردۆغان.

لە راگەیەندراوەکەدا باس لەوە کراوە کە پەیوەندییەکە لە کەشێکی ئەرێنییدا ئەنجامدرا و جەخت لەسەر گرنگیی پەیوەندییەکان لەگەڵ ئیسرائیل کراوەتەوە لە رووی ئاشتیی، سەقامگیریی و ئاسایش لە خۆرهەڵاتی ناوەڕاستدا.

هێرزۆگ خۆشحاڵی خۆی نیشانداوە بە دیالۆگی گشتگیریی تورکیا و ئیسرائیل لە بابەتە دووقۆڵی و هەرێمییەکاندا.

هەردوو سەرکردە هاوڕابوون لەبارەی درێژەدان بە پەیوەندییەکان.