پیرەمەگروون.. خۆپیشاندان دەستیپێكرد و بنکەی هاتووچۆ سوتێنرا

پیرەمەگروون - AA

دوای نیوه‌ڕۆی ئەمرۆ ٩ی کانوونی یەکەم، كاتژمێر ٣:٣٠ خۆپیشاندان لە شارەدێی پیرەمەگروون دەستیپێکرد و بەشێک لە خۆپیشاندەران رێگای سەرەکی دوکان-سلێمانیان داخست.

بەپێی ئه‌و زانیارییانه‌ی لە سەرچاوە تایبەتەکانی ناوچەکەوە دەست پەیامنێری ئاژانسی ئانادۆڵو كه‌وتوون، لە دەرەوەی شارەدێی پیرەمەگروونه‌وه‌، هێزێکی زۆری ئەمنیی و بەرگریی فریاکەوتن هێنراونەتە ناوچەکە و هەوڵیانداوه‌ بڵاوە بە خۆپیشاندەران بکەن.

سەرچاوە ناوخۆییەکانی شارەدێی پیرەمەگروون ئاماژە بەوەدەکەن، خۆپیشاندەران چوونەتە سەر بنکەی هاتووچۆی شارەدێکە، گڕیان تێبه‌رداوه‌ و سەرجەم کەلوپەل و دۆکیومێنتەکانیان سوتاندووە.

سه‌رچاوه‌كان بە پەیامنێری ئاژانسی ئانادۆڵویان راگه‌یاند، هێزەکە هەوڵیان داوە بە نەرمی مامەڵە لەگەڵ خۆپیشاندەراندا بكه‌ن و دواتر بڵاوەیان پێکردوون.

لە ئێستادا رێگای سەرەکی دوکان-سلێمانی کراوەتەوە.