ئاگرەکەی شەوی ڕابردووی هەولێر کۆنتڕۆڵکرا

هەولێر - AA

دوای زیاتر لە هەشت کاتژمێر، ئاگرەکەی سەر شەقامی ٦٠ مەتری هەولێر کۆنترۆڵکرا.

شەوی ڕابردوو ئاگر لە ژمارەیەک دوکانی جوانکاری ئۆتۆمبێل کەوتەوە و تا بەیانی ئەمڕۆش ئاگرەکە بەردەوام بوو.

بەپێی گوتەی شایەدحاڵان، ئاگرەکە سەرەتا لە کۆگایەکی سەرەوەی دوکانەکان بووە کە کەلوپەلی جوانکاری ئۆتۆمبێلی تێدابووە بەڵام بەهۆی ئەوەی کەلوپەلەکان ماددەی نایلۆن و سپڕابوونە هەر ئەمەش بووەتە هۆی تەشەنەسەندنی ئاگرەکە.

هەرچەندە تیمەکانی بەرگری شارستانی هەولێر بە هەموو شێوەیەک هەوڵی کۆنتڕۆڵکردنی ئاگرەکەیاندا بەڵام بەهۆی سەختی شوێنەکە و بوونی ئەو هەموو نایلۆن و سپڕا و ماددەی دیکەی هاوشێوە، نەتوانرا لە کاتەکانی سەرەتا کۆنتڕۆڵی ئاگرەکە بکرێت.

لە ئەنجامی ئەم ڕووداوەدا نزیکەی ٣٠ دوکان و کۆگا سووتاون و وەک شایەدحاڵان دەڵێن زیانەکانی بە زیاتر لە چوار ملیۆن دۆلار دەخەمڵێندرێت.