داوای ئاشكراكردنی چارەنووسی سێ پارێزەرە عێراقییەكە دەكرێت

بەغدا ــ AA

سەندیكای پارێزەرانی عێراق ئیدانەی رفاندنی سێ پارێزەری چالاكوانی خۆپیشاندانەكانی كرد و داواش لە هێزە ئەمنییەكان دەكات كە هەوڵەكانیان بۆ ئاشكراكردنی چارەنووسی سێ پارێزەركە بخەنەگەڕ.

نەقیبی سەندیكای پارێزەرانی عێراق، زیا سەعدی لە راگەیەندراوێكدا بڵاویكردەوە كە رفاندنی پارێزەران لە تاوانە مەترسیدارەكان هەژمار دەكرێت بەو پێیەی تۆقاندن و ترساندن لەنێو پارێزەرانی بەشداربووی خۆپیشاندانەكاندا دروست دەكات.

زیا سەعدی داواشی لە هێزە ئەمنییەكان كرد كە هەوڵەكانیان بۆ ئاشكرایكردنی چارەنووسی ئەو سێ‌ پارێزەر بخەنەگەڕ كە لە لایەن كەسانی نەناسراو رفێندراون و تا ئێستا چارەنووسیان نادیارە و ئاماژەی بەوەشكرد كە سەندیكاكەیان لە رێگەی ئەنجوومەنی بالای دادوەرییەوە بەدواداچوون بۆ پرسەکە دەكات.

دوێنێ‌ یەكشەممە ئەفسەرێك لە وەزارەتی ناوخۆی عێراق بۆ بە ئاژانسی ئانادۆڵو ئاشكرای كردبوو كە پارێزەر و چالاكوانی نێو خۆپیشاندانەكان، عەبدولكەریم عومەیری لە ناوچەی بەلەدیات (رۆژھەڵاتی بەغدا) لەگەڵ پارێزەر و چالاكوان، عەلی ساعدی لەناوچەی سەعالبە (باكووری بەغدا)، هەروەها پارێزەر و چالاكوانێكی دیكە لە پارێزگای میسان بەناوی، عەلی جاسب حەتاب لە لایەن كەسانی نەناسراوەوە رفێنراون و تا ئێستا چارەنووسیان نادیارە.