Sarmand Hameed
04 تشرینی یەکەم 2019•نوێکردنەوە: 05 تشرینی یەکەم 2019
بەغدا - AA
سەرۆکی ئەنجوومەنی نوێنەرانی عێراق، محەمەد حەلبوسی داوای کرد گوێ لە داواکارییەکانی گەل بگیرێت، هاوکات داوای کرد لێکۆڵینەوە لە هێرشکردنە سەر خۆپیشاندەران بکرێت.
محەمەد حەلبوسی لە گوتەیەکی تەلەڤیزیۆنیدا کە لەناو باڵەخانەی ئەنجوومەنی نوێنەرانی عێراقەوە پێشکەشی کرد، رایگەیاند: "پێویستە هێزە ئەمنییەکان بەجۆرێکی دیکە مامەڵە لەگەڵ خۆپیشاندەراندا بکەن، لەهەمان کاتدا پاڵپشتی لە داواکاری خۆپیشاندەران دەکەین و جەخت لەسەر پاراستنی دامەزراوەکانی دەوڵەت دەکەینەوە".
سەرۆکی ئەنجوومەنی نوێنەرانی عێراق داوای لە خۆپیشاندەران کرد لەپاڵ دەوڵەتدابن بۆ لێپێچینەوە و دادگایی کردنی گەندەڵکاران.
حەلبوسی جەختی لە گرنگی لێپێچینەوە لە گەندەڵکاران و بەرەنگاربوونەوەی بیرۆکراسییەت کردەوە.
سەرۆکی ئەنجوومەنی نوێنەرانی عێراق گوتیشی: "گەلی عێراق بەهۆی تیرۆر و گەندەڵییەوە تووشی نەهامەتی بوون، پێویستە رێگە بە گێرەشێوێنەکان نەدرێت خۆپیشاندانەکان بقۆزنە".
محەمەد حەلبوسی: "لە ئەگەری شکستهێنانی دەوڵەت لە جێبەجێکردنی بەڵێنەکانیدا، دەچینە ریزی خۆپیشاندەرەکانەوە".
بڕیارە سبەی شەممە ئەنجوومەنی نوێنەرانی عێراق دانیشتنێکی تایبەت لەسەر خۆپیشاندانەکانی بەغدا و شارەکانی دیکەی عێراق ئەنجام بدات.
لەمباریەوە محەمەد حەلبوسی رایگەیاند، ئامادەی دانیشتنی رۆژی شەممەی ئەنجوومەنی نوێنەران نابێت ئەگەر نوێنەری خۆپیشاندەران بەشداری لە دانیشتنەکەدا نەکەن.
لە رۆژی سێشەممەی رابردووەوە خۆپیشاندان لە شاری بەغدای پایتەخت و ژمارەیەک پارێزگای دیکەی عێراق ئەنجام دەدەرێت و بەپێی ئامارێکی کۆمیسیۆنی باڵای مافەکانی مرۆڤ لە عێراق، لە میانی خۆپیشاندانەکاندا تاکو ئێستا ٤١ کەس کوژراون و دوو هەزار و ٢٣ ی دیکە بریندار بوونە.
