عێراق.. پلانی ئەمنی بۆ پاراستنی گیانی زیارەتکارانی چلەی ئیمام حوسێن

ھەولێر ــ AA

فەرماندەی ئۆپەراسیۆنەکانی بەغدا، فەریق روکن ئەحمەد سەلیم رایگەیاند، ئەو پلانە ئەمنییەی کە تایبەت بە پاراستنی گیانی زیارەتکارانی چلەی ئیمام حوسێن دانراوە، بەسەرکەوتووی جێبەجێ کراوە.

میدیا عێراقییەکان بڵاویان کردەوە، ئەحمەد سەلیم لە راگەیەندراوێکدا ئاماژەی بەوەداوە، فەرماندەیی ئۆپەراسیۆنەکانی بەغدا پلانێکی تایبەتی بە ئامانجی پاراستنی گیانی زیارەتکارانی چلەی ئیمام حوسێنی داناوە کە بەسەرکەوتوویی لە لایەن ھێزە ئەمنییە و ھەواڵگرییەکانەوە، جێبەجێ کراوە.

راشیگەیاندووە کە لە میانی جێبەجێکردنی پلانەکەدا، پشت بەستن بە زانیاریە ھەواڵگرییەکان، زنجیرەیەک ئۆپەراسیۆن بە ئامانجی رێگرتن لە بەئامانجکردنی زیارەتکاران لە لایەن گرووپە تیرۆریستەکانەوە، ئەنجامدراون.

ئەمڕۆ دووشەممە رێورەسمی چلەی ئیمام حسێن لە شاری کەربەلا باشووری عێراق بەڕێوەدەچێت کە سەدان ھەزار کەس لە مەزھەبى شیعە تیایدا بەشداری دەکەن.