Албанскиот премиер Еди Рама пристигна во работна посета на Северна Македонија

СКОПЈЕ (АА) - Премиерот на Албанија, Еди Рама, пристигна во работна посета на Северна Македонија, каде што беше примен од премиерот Димитар Ковачевски, јавува Анадолу.

Работната посета во Северна Македонија е прва во рамките на посетите на земјите од Западен Балкан за албанскиот премиер.

Рама и Ковачевски ќе имаат билатерална средба, а потоа е планирана средба на двете делегации.

Исто така, најавена е и заедничка прес-конференција на двајцата премиери.

Потоа е најавено дека во текот на денот премиерот Рама ќе отпатува за Косово, додека следниот ден Рама ќе ги посети и Босна и Херцеговина, Црна Гора и Србија.

Посетите се реализираат како дел од подготовките за следниот самит на Берлинскиот процес што ќе се одржи во октомври годинава во Тирана.