Во Белград нападнат и тешко повреден камерманот на АА, Нихад Ибрахимкадиќ

БЕЛГРАД (АА) - Камерманот на Anadolu Agency (AA), Нихад Ибрахимкадиќ е нападнат рано утринава, во близина на железничката станица во Белград, јавува Anadolu Agency (AA).

Камерманот на Anadolu Agency, Ибрахимкадиќ, во нападот се здобил со тешки телесни повреди, а по нападот го пронашле припадниците на жандармеријата и помогнале во транспортирањето до Воено-медицинската академија Белград. Ибрахимкадиќ моментално е сместен на одделот за интензивна нега.

Засега неидентификуваните напаѓачи го нападнале камерманот од зад грб, а за време на нападот и по него не зборувале ништо, ниту пак зеле предмети од вредност. Вработениот на АА е нападнат во раните утрински часови, по враќањето од БиХ, каде што престојувал за време на новогодишните празници.

За нападот на камерманот на АА се известени амбасадата на БиХ во Србија и амбасадата на Република Турција, како и надлежните органи на Република Србија.

Anadolu Agency (AA) најостро го осудува нападот на својот вработен и ги повикува надлежните служби во Србија колку што е можно побрзо да го расветлат овој случај.

Нихад Ибрахимкадиќ во Србија како камерман на АА е ангажиран од 2012 година.