СКОПЈЕ (АА) - Во рамки на претседавањето на Северна Македонија со ОБСЕ, во Скопје се одржа регионална конференција на тема „Бездржавјанство во Југоисточна Европа“, јавува Анадолу.
Организатори на конференцијата беа Агенцијата на ОН за бегалци (УНХЦР), Мисијата на ОБСЕ во Скопје, високиот комесар за национални малцинства при ОБСЕ и Канцеларијата на ОБСЕ за демократски институции и човекови права (ОДИХР).
На отворањето на конференцијата, говори имаа претседавачот на ОБСЕ, воедно и министер за надворешни работи на Северна Македонија, Бујар Османи, помошник високата комесарка за заштита во УНХЦР, Џилијан Тригс, високиот комесар за национални малцинства на ОБСЕ, Каират Абдрахманов, директорот на Канцеларијата за демократски институции и човекови права на ОБСЕ, Матео Мекачи, и шефот на Мисијата на ОБСЕ во Скопје, Килијан Вал.
Во изјава за медиумите, министерот Османи рече дека целта на оваа конференција е да се најде решение за феноменот на лицата без државјанство на кои им се ускратени основните права. Според Османи, станува збор за неколку милиони лица во светот.
„Со оглед на тоа што Северна Македонија дури во последната година направи измени на законот за да овозможи системско решение на прашањето за лицата кои се без државјанство, нашата амбиција е да бидеме првата земја во Европа која нема да има свој граѓанин без државјанство“, рече Османи.
Претставничката на УНХЦР, Џилијан Тригс, рече дека правото на државјанство е основно право и клучно за стекнување други права, додавајќи дека за да се стави крај на бездржавјанството, потребна е континуирана политичка волја.
„Последиците се тешки за поединците и семејствата доколку немаат државјанство, а тоа се одразува на целото општество. Кога еден сегмент од општеството е лишен од можности да придонесе, тоа обично има негативно влијание врз општествениот и економскиот развој на таа земја. Затоа, ја поздравувам континуираната посветеност на владите во овој регион, постигнат е многу реален напредок“, рече Тригс.
Шефот на Мисијата на ОБСЕ во Скопје, Килијан Вал, зборуваше за важноста на конференцијата, како и ја поздрави посветеноста на Северна Македонија за елиминирање на бездржавјанството.
„Кога ја презедов функцијата пред 10 месеци, имаше приближно 700 нерегистрирани лица. Но, денес, од утрово, бројките паднаа на 216. Се надевам и верувам дека со континуирана политичка волја и посветеност, ќе успееме да ги намалиме тие бројки на нула до крајот на оваа година“, рече Вал.
На конференцијата присутни беа националните власти и претставници на граѓанското општество од Северна Македонија, Албанија, Босна и Херцеговина, Хрватска, Црна Гора и Србија.
