Fatjon Cuka
25 Септември 2024•Ажурирај: 25 Септември 2024
ТИРАНА (АА) - Во Тирана, главниот град на Албанија, граѓаните продолжуваат со протестите со барање за оставка на градоначалникот Ерион Велиај, остро осудувајќи ја корупцијата, јавува Анадолу.
Демонстрантите на 27. протест организиран од опозициската Демократска партија на Албанија (ПД) и Слободарската партија (ПЛ), како и претставници на граѓанското општество се собраа пред зградата на Собранието на Тирана.
Поранешниот пратеник на Демократската партија, Клевис Балиу, обраќајќи се на протестот рече дека „никогаш нема да се откаже, ниту да ги остави Албанија, Тирана и граѓаните во калта“.
Заменик-претседателот на Советот на Општина Тирана и претставник на Демократската партија, Дорјан Телити, нагласи дека протестите ќе продолжат сѐ додека не ја постигнат својата цел.
Генералниот секретар на Слободарската партија и член на Советот на Општина Тирана, Теди Блуши, во својот говор истакна дека не постои сила во светот што може да ги спречи да „чинат правда“.
На протестот беа и членови на опозициските партии, а говор одржаа и други претставници на опозициските партии и активисти.
За непречено одвивање на протестот, десетици припадници на полициските сили беа распоредени пред зградата на Собранието на Град Тирана, а тензии немаше.
Протестите започнаа на крајот на март по апсењето на поранешни градски функционери обвинети за корупција и „одбивање да пријават имот, прикривање имот или лажно пријавување“.
