Вучиќ: „Очекувам добра излезност и убедлива победа“

БЕЛГРАД (АА) - Претседателот на Србија, Александар Вучиќ, денес гласаше на вонредните избори во Србија на гласачкото место во Нов Белград, известува Анадолу.

Вучиќ во утринските часови стигна на бирачкото место и долго чекаше во ред за гласање бидејќи граѓаните по отворањето на гласачките места почнаа да доаѓаат за да ја извршат својата граѓанска должност.

„Очекувам многу добра излезност и убедлива победа. Се надевам дека сите актери на изборниот натпревар ќе се однесуваат рационално, сериозно и одговорно, иако не сум сигурен во тоа. Очекувам Србија во наредниот период да има многу важни работи, многу нешта што мора да се сторат. Кога велам убедлива победа, верувам дека листата ‘Србија не смее да запре’ ќе биде близу до апсолутното мнозинство или ќе има апсолутно мнозинство“, порача претседателот Вучиќ.

Тој истакна дека на локално ниво „нема да гради односи со Хрватска“.

„Бачка топола и Ниш нема да градат локални односи со Хрватска“, нагласи Вучиќ.

Вучиќ изрази благодарност до српскиот народ од Косово бидејќи од утринава се создава гужва на бирачките места каде може да се гласа на југот од Србија.

Тој истакна и дека се кршел предизборниот молк.

„Го кршеа брутално, но тоа го правеа секојпат. Тоа секогаш е израз на немоќ и обид секогаш некој друг да се обвини за нешто и за сопствените неуспеси. Ќе го слушаме тоа денес и следните денови. На крајот, резултатот ќе биде онаков како што ќе посака народот и онаков каков што народот ќе покаже денес на гласачките места. Верувам дека луѓето на крајот ќе гласаат во согласност со интересите на своите семејства и својата земја. Мислам дека тоа е најважно“, додаде Вучиќ.

Во Србија во тек се вонредни парламентарни избори, вонредни избори за Собранието на Автономната покраина Војводина, вонредни избори за главниот град Белград и уште 65 локални самоуправи.

Гласачките места се отворени во 7, а се затвараат во 20 часот. На парламентарните избори право на глас имаат 6.500.165 граѓани, на покраинските во Војводина 1.669.734, а на изборите за градот Белград 1.613.190.