Selen Temizer
19 Јуни 2023•Ажурирај: 20 Јуни 2023
БРИСЕЛ (АА) - Европската Унија (ЕУ) ги покани лидерите на Косово и на Србија на средба во Брисел без предуслови, со цел деескалација на тензиите и враќање на дијалогот меѓу Белград и Приштина што инаку го води ЕУ, јавува Анадолу.
На прашањето за тензиите меѓу Србија и Косово на прес-конференција одговори Петер Стано, портпарол на Европската комисија.
Стано рече дека високиот претставник на ЕУ за надворешна политика и безбедност, Жосеп Борел, ги поканил српскиот претседател Александар Вучиќ и косовскиот премиер Албин Курти во Брисел, со цел да се намалат тензиите и да се вратат на дијалогот Белград - Приштина.
Наведувајќи дека сѐ уште не пристигнал позитивен одговор од лидерите, Стано рече:
„ЕУ очекува разумен став од земјите што сакаат да станат членки. Ги поканивме и двете и очекуваме да дојдат без никакви предуслови.“
Посочувајќи дека за тоа ќе се разговара на состанокот на министрите за надворешни работи на ЕУ што ќе се одржи на 26 јуни и на Самитот на лидери на ЕУ на 29 и 30 јуни, Стано истакна дека тоа ја покажува важноста што ЕУ му ја придава на ова прашање.
Наведувајќи дека повикот на Борел треба да се опише како можност за страните пред споменатите состаноци, Стано додаде:
„Во спротивно ќе има последици за граѓаните и на Косово и на Србија. Тоа ќе биде одговорност само на двајцата лидери. Не е одговорност на никој друг.“
Српскиот претседател Вучиќ во својата вчерашна оцена рече дека процесот на дијалог меѓу Белград и Приштина е „бесмислен“ во сегашните околности и дека нема да се разговара за ништо додека не бидат ослободени притворените косовски Срби.
Косовските Срби протестираа на 26 мај против изборот на градоначалници Албанци што победија на локалните избори на 23 април во општините Звечан, Зубин Поток и Лепосавиќ, каде што се концентрирани Србите во Северно Косово.
Додека протестите во регионот продолжуваат, косовската полиција и мировните сили на НАТО во Косово (КФОР) ги опколија општинските згради со жичени огради и го зголемија бројот на персоналот во регионот.
Дојде до судири меѓу косовската полиција, која во регионот беше пратена да ги заштити градоначалниците Албанци, и косовските Срби. Во немирите беа повредени 30 војници на КФОР.
