СКОПЈЕ (АА) - По повод 28-годишнината од геноцидот во Сребреница се одржа комеморативна седница во Комитетот за односи меѓу заедниците при Собранието на Северна Македонија, јавува Анадолу.
На седницата учествуваа претседателот на Собранието на Северна Македонија, Талат Џафери, претседателката на Комитетот за односи меѓу заедниците, Арбана Пашоли, пратеничката и членка на овој Комитет, Санела Шкријељ, пратеници, претставници на невладини организации, претставници од бошњачката заедница во земјата, претставници од дипломатскиот кор и други поканети гости.
Седницата започна со едноминутно молчење за почит на жртвите од геноцидот во Сребреница.
Џафери во своето обраќање истакна дека го осудуваат и јасно го именуваат како геноцид извршен во еден тмурен воен период во историјата на Балканот.
Според него, по војна ништо веќе не е како што било претходно, додека, тој рече, „не може да се надомести празнината што останува на улиците, во домовите, не се намалува ниту болката што се всадува во градите“.
„Тоа го почувствував кога бев во Поточари пред неколку години. Го видовме и во очите на косовските бегалци. Го видов неодамна и во Украина. Секојдневјето од ден на ден носи сѐ позагрижувачки вести во блиското и подалечното соседство. Ние не можеме да ја ставаме главата во песок и да се однесуваме како сѐ да е в ред и таму некаде далеку од нас“, рече тој.
„Да се потсетиме дека тоа може да се случи повторно доколку не се заложиме да градиме вистински релаксирани, демократски општества, каде што владеењето на правото и почитувањето на човековите слободи и права, почитувањето на различните и имањето обѕири кон послабите и немоќните е норма и правило, а, пред сѐ, е природно и стандардно“, додаде Џафери.
Меѓу другото, Пашоли рече дека се сеќаваат на еден од најмрачните настани што се случиле во модерното време на човештвото.
„Се сеќаваме на невините животи, на животите варварски жртвувани во настаните од масакрот во Сребреница. Се сеќаваме на тагата, болката, жртвата, солзите, раните на телото и душата. Се сеќаваме на темната страна на човештвото. дивата, сурова и бездушна страна“, нагласи таа.
Пашоли истакна дека тие имаат одговорност да ги воспитуваат новите генерации да бидат ослободени од омраза, додавајќи дека „се сеќаваат за да не се заборави, но и за да не се повтори“.
Од друга страна, Шкријељ нагласи дека денес одбележуваат 28 години од еден од најголемите порази на цивилизациските вредности и лекција што мора да се научи, 28 години од страшното злосторство против човештвото.
„Сребреница е мрачен и тажен дел од историјата што никогаш не смее да се повтори. Тешко е да се живее со ова сеќавање, тешко е да се најдат зборови за да се опишат болката и тагата што го предизвикува овој ден“, истакна таа.
Шкријељ рече дека за одржување на мирот и за негување на демократските вредности потребна е сериозна и континуирана посветеност од сите секој ден.
„Секоја мајка од Сребреница ги претставува сите мајки во светот. Оние што убија над 8 илјади Бошњаци, сакаат да го убијат целото човештво и човечкото достоинство“, додаде Шкријељ.
