Министерката Шекеринска учествува на Берлинскиот форум за надворешна политика

СКОПЈЕ (АА) - На покана на Федералната канцеларија за надворешни работи на Германија и Кербер Фондацијата, министерката за одбрана на Република Македонија, Радмила Шекеринска денеска во Берлин учествуваше на Форумот за надворешна политика, посветен на иднината на Европа и релациите со Русија и Кина, пренесува Anadolu Agency (AA).

Форумот го отвори министерот за надворешни работи на СР Германија, Сигмар Габриел. На панелот насловен „Линии на одбрана – обезбедување на Европа и нејзиното соседство“, говореа министерката Шекеринска, поранешниот генерален секретар на НАТО Андерс Фог Расмунсен, претседателот на Советот на федералниот комитет за надворешни работи на Руската Федерација Константин Косачев и пратеникот Микаел Георг Линк.

Како што соопштуваат од Министерството за одбрана на Македонија, министерката Шекеринска во рамките на дискусијата за европската безбедност и одбрана се осврнала на безбедносните предизвици на Македонија, на регионот, но и состојбата во Украина и можностите за нејзино решавање користејќи ги научените лекции на Балканот.

„Граѓаните на Република Македонија за прв пат, во два изборни циклуси гласаат надвор од своите етнички и религиозни блокови. Граѓаните бараат визија и храброст“, рече министерката Шекеринска. Таа додаде дека целосна сигурност и просперитет во регионот се можни само доколку сите земји-аспиранти за членство во НАТО ја достигнат својата цел – полноправно членство во Алијансата

„Во однос на членството во Европската Унија и во НАТО, сметам дека Република Македонија има не само теоретски, туку и конкретни шанси“, рече пратеникот Микаел Георг Линк, информираат од Министерството за одбрана на Македонија.

Осврнувајќи се на негативното јавно мислење меѓу граѓаните во Германија, во однос на проширувањето во Унијата, нагласи дека во надворешната политика политичарите треба да ги водат, а не да ги следат граѓаните.

На Берлинскиот форум за надворешна политика секоја година учествуваат над 250 министри, политичари, експерти и новинари кои дебатираат на теми поврзани со надворешно-политички прашања на Германија и Европа. Целта на Форумот е да го стимулира интересот кон прашањата на надворешната политика, особено кај помладите генерации. Дел од официјалните високи претставници кои досега учествувале на Форумот, биле и Франк-Валтер Штајнмаер, Волфганг Шојбле, Федерика Могерини и Вилијам Хејг.

Во Берлин, министерката за одбрана Шекеринска ќе има средба со Ралф Брауксипе, парламентарен државен секретар во Министерство за одбрана на Германија, со Ларс Клингбеил од Парламентарната комисија за одбрана во германскиот Бундестаг, со Мајкл Рот, парламентарен државен секретар за европски работи во германското Министерство за надворешни работи.