Elvır Hodzıc
07 Мај 2024•Ажурирај: 09 Мај 2024
БАЊА ЛУКА (АА) - Претседателот на Дирекцијата за верски прашања на Република Туркије, Али Ербас, изјави дека реставрацијата на џамијата Арнаудија е обврска кон религијата, но и кон предците, и додаде дека оваа убавица од Бања Лука е значајна во однос на историјата и архитектурата и дека ќе даде голем придонес во развојот на културата на пријателство, мир и соживот во регионот, јавува Анадолу.
На официјалното отворање на џамијата Арнаудија, покрај Ербаш, присуствуваа и министерот за култура и туризам на Република Туркије, Мехмет Нури Ерсој, директорот на Генералниот директорат за вакафи на Република Туркије, Синан Аксу, министерот за човекови права и бегалци на БиХ, Севлид Хуртиќ, реис-ул-улема на Исламската заедница во БиХ, Хусеин еф. Кавазовиќ, директорот на Вакафската дирекција на БиХ, Сенаид Зајимовиќ, претседателот на босанскохерцеговскиот ентитет на Република Српска, Милорад Додик, градоначалникот на Бања Лука, Драшко Станивуковиќ, и голем број други претставници.
„Бог да ги благослови сите муслимани кои ги посветија своите напори и посветеност на изградбата на џамии, кои отсекогаш биле центар на знаењето, мудроста, единството и солидарноста. Најпрво сакам да го изразам моето огромно задоволство што сум со вас по повод отворањето на едно истакнато дело, симбол на нашето братство, во овој прекрасен град, во оваа плодна земја“, рече првиот човек на турскиот Дијанет, Ербаш.
Нагласувајќи дека исламот е религија чие име значи „мир“ и која ги повикува луѓето на мир, спокојство и спасение, Ербаш потсети на пораката од Куранот во која сите луѓе се поканети да бидат заедно на патот на мирот и безбедноста.
Ербаш рече дека муслиманите со векови ја украсувале земјата со величествени џамии со високи архитектонски и уметнички карактеристики на оската на целисходноста, вредностите и моралот.
„Денес сме заедно во мирна атмосфера на џамија изградена со таква вера и разбирање. Драги браќа и сестри! Џамиите во овој регион, од минатото до денес, на муслиманите им всадиле исламски идентитет, ефективна свест и цврста насока, а од нивните минариња секојдневно се издигнува повикот за спас“, рече Ербаш.
Потсетувајќи дека муслиманите од БиХ платиле висока цена за нивните верувања и вредности низ историјата, Ербаш рече дека не можат да се заборават сликите на многу уништени џамии, вклучително и на Арнаудија.
„Голема работа е да се подигне оваа џамија, која беше целосно урната на 7 мај 1993 година и тоа на Денот на џамиите во Босна и Херцеговина. Реконструкцијата на џамијата Арнаудија е манифестација на нашата верска должност кон џамиите и лојалноста кон нашите предци. Со оглед на историската приказна за оваа џамија, која е прогласена за национален споменик на Босна и Херцеговина, можеме да кажеме дека таа не е само џамија. Тоа е култура на братство, пријателство, заеднички живот и, во одредена смисла, совест на човештвото. Се надеваме дека оваа угледна џамија, која заедно ја реновиравме, со своето историско значење, архитектонска структура и функција, ќе даде голем придонес во развојот на културата на пријателство, мир и соживот во регионот. Тоа ќе биде најдобриот претставник на исламските принципи за мир и добриот морал на муслиманите“, рече Ербаш.
Тој најави продолжување на плодната соработка меѓу државите, институциите и народите на Туркије и Босна и Херцеговина.
Арнаудија на некој начин низ историјата го добива епитетот „сестра“ на џамијата Ферхадија, па тие и ја делат трагичната судбина, односно на 7 мај 1993 година, и двете беа детонирани во раните утрински часови.
Џамијата Арнаудија е една од 16-те џамии уништени за време на агресијата во Бања Лука. Идејата за обнова на Арнаудија беше претставена во 2015 година, на крајот на 2016 година беше потпишан Протоколот за обнова на оваа убавица од Бања Лука со Генералниот директорат на вакафите при Министерството за култура и туризам на Туркије, додека следната 2017 година, свечено беше поставен камен-темелникот за изградба. Џамијата е реконструирана во автентичен стил.
