Собранието на Северна Македонија го одложи пописот од април за септември

СКОПЈЕ

По дводневна расправа, Собранието на Република Северна Македонија ги усвои законските измени за одложување на Пописот на населението, домаќинствата и становите од април за септември 2021 година, пренесува Агенција Анадолија (АА).

Ова беше договорено на лидерската средба одржана во понеделникот меѓу премиерот и истовремено претседател на Социјалдемократскиот сојуз на Македонија (СДСМ), Зоран Заев, и претседателот на опозициската ВМРО-ДПМНЕ, Христијан Мицкоски.

Меѓутоа, гласањето на измените на Законот за попис се одложија поради противење на албанските опозициски партии.

За измените на Законот за попис на населението, домаќинствата и становите гласаа 95 пратеници, а против беа 12. Измените ги добија и потребните гласови во рамки на гласањето по Бадентер, а немаше воздржани.

Со ист број на гласови беа усвоени измените на Изборниот законик со кој се одложија локалните избори од првата за втората половина на октомври, а се изгласа и да се користат терминали за отпечатоци од прст на изборите.

Според првичниот закон, пописот на резидентното население на Република Северна Македонија требаше да се спроведе од 1 до 21 април, со употреба на пренослив компјутер, на посебна апликација.