НОВИ ПАЗАР
Во новопазарската касарна „Рифат Бурџовиќ Тршо“ веќе седум години под ист кров се наоѓаат исламски и православни простории за молитва. Припадниците на Војската на Србија се од различна религиска и етничка припадност, па е важно секој од нив подеднакво и без попречување да го користи своето право на вероисповед и верски обреди.
Во петокот, за муслиманите припадници на Војската на Србија во касарната беше џума (петочна молитва), кога во месџидот претстојуваа поголем број верници, а за православните верници беше света литургија. Таа, поради ангажманот на воениот свештеник во повеќе касарни, тука се одржува еднаш месечно. Двете простории за богослужба се отворени за верниците секој ден, па така се извршуваат редовни намази (молитви) во муслиманскиот простор, а во својот богослужбен простор се молат и православните верници.
Сите разноличности на кои тука гледаат како најголемо богатство водат кон иста цел, љубов кон заедничка држава, почитување, соживот и толеранција меѓу луѓето.
За важноста на молитвениот простор за муслиманите говореше првиот аџија меѓу припадниците на Војската на Србија, Елвир Смаилагиќ. Почитувањето на верските и националните права во текот на службата е јасна порака на државата.
„Овој богослужбен простор е многу важен за припадниците на исламската вероисповед со оглед дека ние од овие простори тежнееме кон верата. Со формирањето на овој богослужбен простор Војската на Србија, Министерството за одбрана и Република Србија докажаа дека нема никакви разлики меѓу луѓето. Вратите на сите муслимани од Нови Пазар и Република Србија се ширум отворени да дојдат и да работат во Војската на Република Србија, бидејќи ова е нивна држава како и на сите граѓани", вели во разговор за Агенција Анадолија (АА) помошникот на главниот воен имам на Војската на Србија, заставникот Смаилагиќ.
„Секој војник кој тука ќе дојде да изврши молитва излегува сигурно поисполнет и подобар отколку кога дошол. Овој богослужбен простор му овозможува и му дава сила за извршување на сите наменски задачи кои се тешки, од тука тој излегува многу побогат, порасположен и поспремен за работа“, додава тој.
Богослужбениот простор е важен и во животот на православните верници, припадници на Војската на Србија.
Воениот свештеник Владан Вуковиќ вели дека тоа што две простории за богослужба се под истиот покрив на касарната во Нови Пазар е уште еден показател на добрата соработка и божјата промисла дека сите луѓе се исти, на ист пат без оглед на верата.
„Многу е важно постоењето на овој богослужбен простор од причина што секој припадник на оваа единица во кој било период од денот или ноќта може да влезе тука, да се помоли на Бога и да запали свеќа за здравје и спасение на своите најблиски. Во денешно време, со многу обврски и стрес, ова е единствено молитвено место каде што секој припадник на Војската може да се присобере, да размислува за себе и животот, да се помоли на Бога, да го почувствува мирот кој често го губиме живеејќи и борејќи се во овој свет“, рече воениот свештеник на Командата на Втората бригада, поручник Владан Вуковиќ.
Групата за верски работи на ниво на бригада редовно го следи остварувањето на правата на сите припадници на бригадата. Заклучокот е дека верниците во Војската на Србија ги уживаат сите гарантирани права.
Освен богослужбениот простор во Нови Пазар, муслиманите припадници на Војската на Србија имаат месџиди во касарната „Батајница 1“ на Воено-медицинската академија во Белград.
