Турската министерка за семејство и социјални услуги, Махинур Оздемир Ѓокташ, учествуваше на Средбата на жени претприемачки на Балканот организиран од страна на Светскиот турски деловен совет (DTİK), која се одржа во Скопје со цел зајакнување на женското претприемништво и економската соработка во регионот, јавува Анадолу.
На средбата учествуваа министерот без ресор во Владата на Северна Македонија Зулфикар Зејнула, турскиот амбасадор во Скопје Фатих Улусој, пратеници, претставници на Одборот за надворешни економски односи на Турција (ДЕИК) и ДТИК, турски и локални институции, претставници на дијаспората и турски жени претприемачки кои работат на Балканот.
Ѓокташ истакна дека женското претприемништво е еден од основните елементи на општествениот развој и благосостојбата на семејството, додавајќи дека жените во регионот не само што произведуваат, туку основаат компании, создаваат работни места, развиваат технологии и отвораат нови економски можности.
Таа изрази уверување дека може да се создаде нов модел на економска соработка меѓу Турција и Балканот, истакнувајќи дека потенцијалите на двете страни можат посилно да се обединат преку жените претприемачки. „Можеме да создадеме мрежа на женско претприемништво на Балканот“, рече таа.
Во рамки на средбата се одржа и посебната сесија „Моќта на жената, иднината на претприемништвото“, на која Ѓокташ порача дека жените треба да бидат активни не само како корисници, туку и како развивачи на технологија, претприемачи, инвеститори и носители на одлуки.
Таа истакна дека Турција во изминатите 24 години спровела значајни реформи за унапредување на можностите за жените и дека продолжува со поддршка на женското економско и социјално зајакнување.
На сесијата говореа и турскиот амбасадор Улусој, членката на Управниот одбор на ДЕИК и Извршниот одбор на ДТИК Берна Ѓозбаши, претседателот на Советот на претставници на Балканот при ДТИК, Левент Садик Ахмет, и претседателката на Управниот одбор на Халкбанк, Мелтем Тајлан Ајдин.
Улусој истакна дека Турција и Северна Македонија се пријателски и сојузнички земји со длабоки историски и културни врски, додавајќи дека трговската размена меѓу двете земји е близу една милијарда долари, со заедничка цел таа да достигне две милијарди долари.
За време на нејзината посетата во Скопје, Ѓокташ и министерот за социјална политика, демографија и млади Ѓоко Велковски порано потпишаа Меморандум за разбирање и соработка во областа на социјалните услуги, со цел размена на искуства и добри практики.
Ѓокташ оствари средба и со претседателот на Собранието Африм Гаши, со кого разговараше за семејните вредности, социјалните политики и натамошното зајакнување на билатералната соработка.
