„Време е за грчко-турска енергетска соработка во Егејот и Источниот Медитеран“

ИСТАНБУЛ (АА) - Шефот на грчката државна агенција за инвестиции и унапредување на трговијата, Маринос Јанопулос, рече дека „дојдено е време“ Туркије и Грција да се фокусираат на енергетската соработка во Егејското Море и Источниот Медитеран, јавува Анадолу.

„Имајќи ги предвид историските културни и трговски врски меѓу нашите земји, заедно со соработките воспоставени во рамките на позитивната агенда, сметам дека е дојдено време Грција и Туркије да ги преземат следните чекори кон поттикнување на енергетската соработка во Егејското Море и Источниот Медитеран“, изјави Јанопулос, извршен директор на „Ентерпрајс Грција“, во интервју за Анадолу.

Изјавите на Јанопулос дојдоа откако турската метропола Истанбул беше домаќин на првиот грчко-турски енергетски форум во април, на кој се собраа експерти и претставници од енергетските сектори на двете земји.

Тој препорача двете земји да ги засилат разговорите за енергетиката, да организираат билатерални деловни и енергетски форуми и да промовираат заеднички инвестиции во енергетската инфраструктура и технолошкиот развој.

Тој понатаму советуваше дека двете земји треба да ги охрабруваат јавно-приватните партнерства, при што двете влади ќе продолжат со усогласување на нивните регулаторни и законски рамки за ефективно поддржување на прекуграничните проекти.

Јанопулос истакна дека „Ентерпрајз Грција“ може да игра улога во помагањето на билатералната соработка.

„Ентерпрајз Грција активно ги поддржува и учествува во иницијативите на нашата Влада кои ја промовираат позитивната агенда на билатерално ниво“, рече тој. „Ќе ни биде задоволство да учествуваме во сите идни иницијативи кои ја промовираат енергетската соработка на Грција и Туркије.“

Во последните две децении, Грција и Туркије воспоставија големи интерконекции за електрична енергија и гас преку грчко-турската граница и развија активен прекуграничен пренос, трговија со електрична енергија и гас.

- „Енергијата ќе биде еден од клучните бизнис-сектори за соработка“ -

Бидејќи Грција нуди можности за инвестирање за турските компании во неколку енергетски потсектори, тој препорача Туркије да го искористи потенцијалот за обновливи извори на земјата, земајќи ги предвид големите инфраструктурни проекти што се развиваат и нејзината клучна улога во потенцијалот на енергетскиот микс на ЕУ и пристапот до енергетскиот пазар на ЕУ.

Според Јанопулос, меѓу овие можности се и новата инфраструктура во преносот на природен гас, како што се терминалите за течен природен гас (LNG), цевководи, интерконекции и системи за дистрибуција на природен гас.

Тој наведе и други инвестициски можности како што се проекти за обновлива енергија, биомаса, мали хидроцентрали и геотермална енергија.

Други области за соработка би можеле да бидат зелениот водород, заробувањето на јаглеродот, складирањето енергија, проектите за енергетска ефикасност и чување, проектите за интерконекција на електричната мрежа и одржлива енергија за островите, како и надградба и развој на прекугранични интерконекции на електричната мрежа.

Високиот грчки претставник, исто така, изјави дека турските компании можат да профитираат на растечкиот грчки пазар за обновливи извори на енергија со искористување на неколку претстојни можности, како што се директно инвестирање, формирање стратешки унии со грчки фирми за обновлива енергија и искористување на реформите на грчката Влада.

Во текот на последните четири години, грчката Влада спроведе неколку иницијативи и реформи за поддршка на зелената транзиција на земјата.

Меѓу нив е целта да се зголеми количеството обновлива енергија на 23,9 гигавати до 2030 година, од 11 гигавати во 2023 година во согласност со Ревидираниот национален план за енергија и клима (2023-2030). Тој, исто така, опфаќа воспоставување на добро структурирана рамка за аукции за обновливи извори на енергија, ефикасна регулаторна рамка за инвестиции и имплементација на нови закони за инвестиции.

Потсетувајќи за неодамнешната средба меѓу турскиот претседател Реџеп Таип Ердоган и грчкиот премиер Киријакос Мицотакис во мај, Јанопулос рече дека двајцата лидери ја потврдиле „позитивната агенда и ветувањето за удвојување на билатералните економски работи меѓу нашите соседни земји во следните 5 години.“

Јанопулос советуваше двете земји да соработуваат со оглед на значајните енергетски предизвици што претстојат со нивната посветеност за намалување на емисиите на стакленички гасови и декарбонизација, истовремено одржувајќи ја енергетската безбедност.

„Енергетиката ја сметаме за еден од клучните бизнис-сектори за соработка и развој на заеднички проекти во двете земји“, истакна тој.

„Градењето посилни врски во енергетскиот сектор, особено преку обновливите извори на енергија, има огромен потенцијал за двете земји“, посочи Јанопулос.

„Сигурни сме дека постојат многу добри изгледи и можности за понатамошна соработка во иднина меѓу нашите земји во широкиот енергетски сектор, како што видовме и разговаравме за време на нашето неодамнешно учество на првиот енергетски форум Грција - Туркије“, рече тој.