Централната банка на Украина го ограничи подигнувањето готовина

КИЕВ (АА) ‒ Централната банка на Украина го ограничи подигнувањето готовина, како и девизните трансакции, пренесува Агенција Анадолија (АА).

Во соопштението на Централната банка на Украина се нагласува дека во земјата е прогласена вонредна состојба.

Се наведува дека поради наведената одлука донесени се разни ограничувања на финансиските пазари.

„Запрена е работата на украинскиот девизен пазар, освен продажбата на девизи. Износот на подигнување готовина од банкарските сметки, исто така е ограничен на 100.000 гривни.“

Во соопштението е нагласено дека овие чекори се преземени за да се обезбеди стабилно функционирање на финансискиот систем на земјата и непречено функционирање на клучните институции.

Рано утрово дојде до експлозии во повеќе украински области, вклучително и во главниот град Киев, а воени возила ја преминаа границата од Белорусија во Украина.

Рускиот претседател Владимир Путин рано утрово ја најави воената интервенција во Украина, откако во понеделникот призна независност на сепаратистичките региони Доњецк и Луганск во источна Украина. Признавањето предизвика меѓународна осуда и најави за построги санкции кон Москва.

Путин во последните месеци собра повеќе од 100.000 руски војници околу Украина, но во повеќе наврати негираше дека планира инвазија.