Индонезија: Питон долг девет метри проголта жена

ИСТАНБУЛ (АА) - Питон долг девет метри проголта жена во индонезиската провинција Јужен Сулавеси, пренесува Анадолу.

Според весникот „Сан“, 36-годишната Сиријати од селото Ситеба во провинцијата Јужен Сулавеси вчераутро излегла од својот дом за да купи лекови за своето болно дете.

Откако не се вратила дома, полицијата излегла на терен за да утврди што се случило.

Нејзините влечки и панталони ги пронашол сопругот на Сиријати на 500 метри од куќата.

Полициски службеници забележале деветметарски питон на десетина метри од местото каде што биле пронајдени влечките.

Виделе дека е надуен, па се посомневале дека ја проголтал несреќната жена.

Со помош на селаните телото на жената е извадено од питонот.

Сиријати е втора жена усмртена од питон во последните 24 дена.

На 9 јуни тело на 45-годишна жена е извадено од петметарски питон во селото Калемпанг во провинцијата Јужен Сулавеси.