КОЊА (AA) - АБДУЛАХ ДОГАН - Севда Севан Усак, е патник добротвор. Таа доби пофалба од оние што ги виделе нејзините активности за помош во Масаи, родниот град на нејзиниот сопруг Фабио Саита, со кој се запознала пред 5 години во Танзанија, пишува Anadolu Agency (AA).
Севда Севан Усак (48) е патник кој живее во Истанбул, а е посветена на фотографирањето. Усак патувала во 74 земји, и има пишувано патописи за весници и списанија заедно со фотографии од природа и луѓе. Таа ја нашла љубовта во Танзанија пред пет години.
Усак се запознала со Фабио Сумаили Саита, кој работи земјоделство и сточарство во регионот Масаи. Одлучува да се омажи со Саита, во кој се заљубува на прв поглед.
Таа е во среќен брак веќе пет години и дел од годината минува во Масаи, каде што живее нејзиниот сопруг. Сепак, Усак продолжува и со нејзината работа во Турција, каде што управува со агенција која објавува детски книги.
- „Белата Масаи“ ги освои срцата
Усак била сведок на тешкиот живот на луѓето во областа Масаи, каде што живее нејзиниот сопруг. Таа воспоставила контакти со организации од цивилното општество во Турција, за да им помогне на луѓето од Масаи, област во која нема електрична енергија и вода. Усак успеа да издејствува отворање на четири длабоки бунари за вода за само една година.
Чистата вода што се вади од бунарите, во регионот што станал непогоден за живеење поради сушата, ја сменила судбината на овој регион. Усак, која одгледува 15 видови зеленчук и овошје во Африка, каде што жителите на Масаи живеат со ограничени ресурси, наскоро ја придобила љубовта на луѓето.
Усак, позната како „Белата Масаи“ и „Турска невеста“, го предводеше развојот на градинарството во регионот. Таа ја освои љубовта на луѓето и благодарение на дијалогот што го воспостави со жителите од регионот, името Севда веќе им се дава на штотуку родените деца.
„Белата невеста“, исто така, објавува интересни работи на социјалните мрежи, и ја промени судбината на Масаи, област каде што живеат две илјади луѓе. Таа е добитник и на многу награди.
Во Коња, каде што Севда Усак дошла за да присуствува на конференција, во разговор за Anadolu Agency (AA) раскажа за нејзиниот извонреден живот.
Таа рече дека е родена во Швајцарија и посетила 74 земји во последните 25 години. Во земјите што ги посетила, ги промовирала природата, културата и човекот, а приказната што ѝ го променила животот започнала во Танзанија пред 5 години.
- „Црна-бела“ љубов на прв поглед -
Усак изјави дека отишла да го види племето Масаи кое живеело во најоддалечените места во земјата.
„Потоа го запознав маж ми во областа Масаи. Тој се занимава со сточарството. Ми понуди да се омажам за него. Сè се одвиваше брзо и наскоро се венчавме. По 3-4 месеци престојувам во Танзанија, а потоа ја работам работата во Турција. Во меѓувреме одам и во други земји. Сопругот, исто така, доаѓа тука во текот на годината. Работата ја приспособуваме според нашата ситуација. Тој ја сака Турција и е многу симпатичен. Моите блиски секогаш ми велеа: „Знаевме дека ќе направиш нешто, но не очекувавме дека ќе се омажиш за Африканец.“ Сите очекуваа дека ќе стапам во брак со странец, ама никој не очекуваше дека тоа ќе биде човек од Танзанија. И моето семејство го мисли истото, но исто така, и многу го сакаат сопругот. Многу е почитуван. Со неговата весела личност ја освои нивната љубов. Комуницираме на англиски. Се обидувам да го научам нивниот јазик свахили. Исто така, и тој учи турски“, рече таа.
- Жителите од Масаи за првпат се сретнаа со зеленчук
Опишувајќи дека лавовите, жирафите и многуте диви животни живеат во оваа област, Усак истакна дека сточарството е карактеристично во овој регион и дека е тешко да се стигне до чиста вода.
„Пред четири години, имаше голема суша во родниот град на сопругот. На тоа бев сведок и јас. Немаме вода или електрична енергија во куќата каде што живееме. Животот во регионот е многу тежок. Се сретнав со здруженија и фондации од Турција. Во рок од една година беа отворени четири длабоки бунари за вода. Животот на луѓето се промени целосно. Тие пешачеа 3-5 часа на ден за да стигнат до вода. Водата, исто така, беше нечиста, и не беше здрава. Овде се садеше само пченка, а зеленчук и овошје никогаш не се одгледува во регионот. Донесов семе од Турција, на 3-4 хектари земјиште засадивме 15 видови. Сега учиме градинарство“, рече таа.
- Добитник на бројни награди
Усак, која доби бројни награди за својата посветеност во далечениот регион Танзанија, го наведе следното: „Некој мора постојано да биде присутен поради активностите. Јас имав таков придонес. Живеев со нив. Тие ме нарекуваат „Белата Масаи“. Брзо се адаптирав на нив и на регионот. Се создаде блискост и љубов. Наградата ја добив затоа што живеам во регионот и можам да ја правам оваа работа“.
Усак е добитник на наградата на 4-та Меѓународна награда за добрина од Фондацијата на Турската верска заедница под слоганот „добрината ќе го промени светот“, меѓу 1500 приказни.
