Меѓународните истражувачи што учествуваа во 6. Национална арктичка научноистражувачка експедиција на Турција спроведоа истражувања за влијанието на климатските промени врз поларните екосистеми, распространетоста на арктичките видови птици и загадувањето со микропластика, јавува Анадолу.
Експедицијата, позната како ТАСЕ-ВИ, заврши по ангажирањето на 12 научници во реализацијата на 12 проекти и истражувања од областа на океанографијата, биологијата, хемијата, атмосферската динамика, метеорологијата, геодезијата и сателитските системи.
Експедицијата се одржа под покровителство на Претседателството на Турција, во координација со Министерството за индустрија и технологија, а ја предводеше Институтот за поларни истражувања на Научноистражувачкиот совет за научни и технолошки истражувања на Турција (ТУБИТАК КАРЕ).
Патувајќи со истражувачки брод до 82 степени северна географска широчина, тимот ги истражуваше приоритетните научни прашања од национално и меѓународно значење во рамките на Националната стратегија за поларни науки на Турција.
Истражувањата беа насочени кон глобалните климатски промени, загрозените екосистеми и влијанието на човековите активности врз животната средина.
Во експедицијата учествуваа и тројца меѓународни истражувачи од Аргентина, Бугарија и Уругвај, кои го проучуваа влијанието на климатските промени врз поларните екосистеми, географската распространетост на арктичките видови птици и загадувањето на воздухот со микропластика.
- Влијанието на повлекувањето на глечерите врз екосистемите
Паула Арбиза, биолог и магистрант по науки за Земјата, која го претставува Уругвајскиот антарктички институт, ги истражуваше екосистемите во арктичките фјордови погодени од глечерите.
Арбиза изјави дека истражувачите ќе ги споредат податоците собрани за време на експедицијата со резултатите од нивните истражувања на Антарктикот.
Цел на истражувањето е да се утврди како повлекувањето на глечерите предизвикано од климатските промени влијае врз состојбата на околните екосистеми.
Истражувачите собраа примероци од седименти и ги испитуваа малите организми како биолошки показатели за состојбата на екосистемите, а истовремено ги анализираа и факторите на животната средина во регионот.
Се очекува споредбата меѓу Арктикот и Антарктикот да им помогне на научниците подобро да разберат како поларните екосистеми на двете хемисфери реагираат на зголемувањето на температурите и топењето на глечерите.
- Набљудувани популациите на арктичките птици
Бојан Мичев од Бугарската академија на науките ја истражуваше структурата на заедниците на арктичките птици и географската распространетост на видовите што се среќаваат само во тој регион.
Мичев изјави дека за време на експедицијата на отворено море биле забележани околу 30 до 40 видови птици.
Иако птиците се гнездат на копно, многу од нив прелетуваат над морето за да се хранат, што им овозможило на истражувачите да ги регистрираат нивното присуство и распространетост по должината на маршрутата на експедицијата.
Се очекува набљудувањата да придонесат кон истражувањата за тоа како промените во животната средина влијаат врз живеалиштата, местата за исхрана и миграционите движења на арктичките популации на птици.
- Собрана микропластика од поларната атмосфера
Артуро Хубер од Аргентинскиот антарктички институт го истражуваше загадувањето на атмосферата со микропластика во поларниот регион.
Хубер изјави дека системот што се користел за време на експедицијата собирал честички од воздухот на филтрите. Примероците ќе бидат анализирани во лаборатории за да се утврди концентрацијата на микропластика во арктичката атмосфера.
Ваков метод претходно се користел и на Антарктикот, што ќе им овозможи на истражувачите да го споредат загадувањето со микропластика во двата поларни региона.
Микропластиката може да се пренесува на големи растојанија преку атмосферските и океанските струења, овозможувајќи честичките што потекнуваат далеку од половите да стигнат до оддалечените средини на Арктикот и Антарктикот.
Се очекува со компаративното истражување да се обезбедат дополнителни сознанија за обемот, изворите и движењето на загадувањето со микропластика низ поларните региони на планетата.
