НАСА ја покани Индија да се вклучи во мисијата за изградба на база на Месечината

НАСА ја покани Индија да се вклучи во амбициозната американска мисија за изградба на база на Месечината, изјави денес американскиот амбасадор во Њу Делхи, јавува Анадолу.

Во обид за продлабочување на вселенското партнерство меѓу САД и Индија, амбасадорот Серхио Гор изјави дека НАСА ја поканила Индиската организација за вселенски истражувања (ИСРО) да се „вклучи во нејзината програма за база на Месечината“.

Најавата следува по деветтиот состанок на заедничката работна група за цивилна вселенска соработка меѓу Индија и САД, чиј домаќин беше Индија на 5 и 6 август во седиштето на ИСРО во јужниот град Бенгалуру.

„Двете страни разговараа за проширување на соработката, како и за идни партнерства во областа на науката и технологиите за вселенски летови со човечки екипаж“, се наведува во соопштението на Амбасадата на САД во Њу Делхи објавено денес.

НАСА ја опиша базата како „прва лунарна станица на човештвото, место каде што астронаутите ќе живеат, ќе работат и ќе истражуваат во близина на Јужниот Пол на Месечината“.

„Преку серија мисии со и без човечки екипаж, НАСА и нејзините партнери ќе ја изградат потребната инфраструктура за одржливо присуство на луѓето на Месечината, ќе овозможат нови научни откритија и ќе се подготват за идни истражувања на длабоката вселена“, соопшти НАСА.