Контроверзна црковна лидерка обвинета за поткуп и проневера во Јужна Кореја

АНКАРА (АА) - Јужнокорејските обвинители денес поднесоа обвинение против контроверзната црковна лидерка Хан Хак-џа за поткуп, проневера и фалсификување докази поврзани со поранешната прва дама Ким Кион Хи и владејачката Партија на народната моќ, според Јонхап њуз, пренесува Анадолу.

Хан, која има 82 години, беше приведена на 23 септември откако судот одобри налог за нејзино приведување по обвиненија за поткуп.

Според обвинението, таа заедно со поранешен црковен службеник со презиме Јун, наводно, му обезбедила 100 милиони вона на пратеникот Квеон Сеонг-донг од владејачката партија во замена за ветување дека ќе ѝ помогне на црквата доколку Јун Сук Јол победи на претседателските избори во 2022 година – што и се случи.

Освен тоа, Хан се сомничи дека со средства од црковната каса купила скапоцен накит и чанти „Шанел“, кои ѝ ги подарила на сопругата на претседателот Ким Кеон Хи, со цел да добие привилегии. Таа наводно му наредила на Јун да ги уништи доказите пред почетокот на истрагата за нејзиното наводно коцкање во странство.

Од црквата, сепак, тврдат дека Хан нема никаква поврзаност со случајот и дека сите наводни дејства ги спровел поранешниот службеник без нејзино знаење.

Црквата на обединување, основана во 1954 година од силни антикомунисти во Јужна Кореја, често се опишува како култ.

Јапонскиот суд претходно годинава наложи распуштање на нејзината гранка, со што организацијата го изгуби својот правен статус.