Марта Кос: Проширувањето на ЕУ повеќе не е прашање на зголемување на Унијата, туку на нејзино зајакнување

Европската комесарка за проширување Марта Кос денес во Загреб изјави дека проширувањето на Европската Унија повеќе не е прашање на зголемување на Унијата, туку на нејзино зајакнување, порачувајќи им на земјите кандидати дека мора да покажат јасен стратегиски избор во корист на Европа, јавува Анадолу.

Говорејќи на Конференцијата на амбасадори, генерални конзули, конзули и воени аташеа, Кос рече дека 2026 година ќе биде рекордна година за процесот на проширување бидејќи во првите осум месеци биле отворени и затворени повеќе преговарачки поглавја отколку во која било година во последните 25 години.

„Проширувањето денес не е прашање на тоа да ја направиме нашата Унија поголема. Проширувањето е прашање на тоа да се направиме посилни“, рече Кос, се наведува во соопштението на Европската комисија.

Таа оцени дека геополитичките сиви зони на европскиот континент ги зголемуваат неизвесноста и ранливоста, поради што проширувањето стана еден од клучните инструменти за зајакнување на стабилноста и безбедноста на Европа.

Како примери за напредок ги издвои Црна Гора, која затворила повеќе од половина од преговарачките поглавја и за која земјите членки почнале да подготвуваат договор за пристапување, како и Албанија, која ги исполнила клучните привремени мерила во областа на владеењето на правото и почнала да затвора преговарачки поглавја.

Кос наведе дека Украина и Молдавија во изминатите две години, исто така, оствариле значителен технички напредок во усогласувањето со правното законодавство на ЕУ. Таа ги повика земјите членки да овозможат формално отворање на сите преостанати преговарачки кластери за двете земји.

- Кандидатите мора да ја изберат Европа -

Кос рече дека сака и другите земји кандидати да ѝ се придружат на групата предводници, но само доколку покажат еднаква одлучност во спроведувањето на реформите и градењето доверба со сите земји членки.

„Земјите кандидати мора вистински да ја изберат Европа. Нашата заедничка безбедност и заедничките вредности“, порача Кос.

Таа најави дека Европската комисија во септември ќе претстави предлози за тоа како ЕУ треба да се подготви за прием на нови членки во пресрет на состанокот на Европскиот совет за проширувањето, планиран за октомври.

Според нејзините зборови, потребно е да се постигне консензус за последиците од приемот на нови членки врз сегашните членки и буџетот на ЕУ, за внатрешните реформи што би овозможиле поефикасно донесување одлуки, заштитата на владеењето на правото, како и за промената на моделот на проширување.