Malenga Byobe
04 Декември 2024•Ажурирај: 05 Декември 2024
КИНШАСА (АА) - Најмалку 79 лица починаа како последица на мистериозна болест во југозападната провинција на Демократска Република Конго (ДР Конго) минатиот месец, а министерот за здравство вчера објави дека е испратен тим од експерти за да се утврди точната природа на болеста, јавува Анадолу.
„Ситуацијата во селото Панци во провинцијата Кванго е алармантна, со над 60 луѓе кои животот го загубиле како последица на мистериозна болест во период меѓу 10 и 25 ноември, со што вкупниот број смртни случаи во регионот се искачи на 79 минатиот месец“, изјави министерот за здравство Самуел Камба Роџер во соопштението објавено денес.
„Овие симптоми може да укажуваат на неколку заразни болести, вклучително и мајмунски сипаници и ебола, од кои и двете претходно предизвикаа голема загриженост во ДР Конго“, рече министерот.
Тој додаде дека Владата испратила тим од епидемиолошки експерти за да ја проценат ситуацијата и да ја утврдат природата на болеста.
„Оваа епидемија веќе предизвика смрт кај 79 луѓе, што ја вознемири провинциската Влада на Кванго. Гувернерот одлучи да испрати тим на терен за да го идентификува проблемот, да собере примероци и да ги испрати до ИНРБ (Национален институт за биомедицински истражувања) за понатамошни лабораториски анализи“, рече министерот.
ДРК има долга историја во борбата против епидемиите, а Владата останува внимателна во соочувањето со новите болести. Јавните здравствени напори, вклучително и епидемиолошкиот надзор и свеста на заедницата, се клучни за контрола на оваа ситуација и спречување на ширењето на заразни болести.
Мајмунските сипаници, иако се помалку смртоносни од вирусот ебола, повторно се појавија во одредени региони на Африка, предизвикувајќи загриженост за нивната заразност.
Од друга страна, еболата, позната по својата висока стапка на смртност и брз пренос, останува постојана закана во ДР Конго, со повторливи епидемии кои ги погодуваат ранливите заедници.
