ОН: Газа останува најсмртоносно место за хуманитарните работници веќе трета година

Газа е најсмртоносно место во светот за хуманитарните работници веќе трета година, при што во 2025 година се убиени 186 припадници на хуманитарниот персонал, соопшти денес Канцеларијата на ОН за координација на хуманитарните прашања (OCHA), јавува Анадолу.

Судан се најде на второ место со 71 убиен хуманитарен работник во текот на годината, соопшти OCHA во соопштението по повод Светскиот ден на хуманитарноста.

Во светот 907 хуманитарни работници биле убиени, повредени или киднапирани во 2025 година, што претставува уште еден рекорд на насилство врз хуманитарниот персонал, според податоците од Базата на податоци за безбедноста на хуманитарните работници на „Хуманитариан ауткамс“.

Иако годишниот број на смртни случаи се намалил на 350, Канцеларијата на ОН соопшти дека вкупното ниво на насилство не покажува знаци на намалување. Дополнителни 322 хуманитарни работници биле повредени, а 235 киднапирани.

„Повеќе од 1.000 хуманитарни работници се убиени за само три години и тоа е целосно неприфатливо“, изјави Том Флечер, потсекретар на ОН за хуманитарни прашања и координатор за итна помош.

„Но само укажувањето на тоа нема да го заштити следниот хуманитарен работник. Државите мора да го почитуваат меѓународното хуманитарно право и да ги користат сите средства за заштита на цивилите и нашите колеги. А за оние што ги прекршуваат правилата, мора да има вистински последици“, додаде тој.

Насилството продолжи и во 2026 година, при што досега во светот се убиени најмалку 82 хуманитарни работници, 97 се повредени, а 39 се киднапирани, соопшти Канцеларијата на ОН.

- Беспилотните летала претставуваат закана -

Канцеларијата предупреди дека употребата на евтини и приспособливи вооружени беспилотни летала ги изложува цивилите и хуманитарниот персонал на сè поголема опасност, особено во урбани средини.

Вооружените беспилотни летала биле одговорни за 80 отсто од смртните случаи меѓу цивилите во Судан во првите четири месеци од 2026 година, при што биле погодени локации како пазари и здравствени установи, според Канцеларијата на ОН.

Во Украина, беспилотни летала убиле 80 цивили само во април, а нападите со беспилотни летала, исто така, убиле цивили и оштетиле цивилна инфраструктура во Русија. Нападите со вооружени беспилотни летала во Колумбија се зголемиле четирипати меѓу 2024 и 2025 година.

Хуманитарните работници сè почесто се изложени на вакви напади. Еден хуманитарен работник бил убиен во напад со беспилотно летало врз станбена зграда во Демократска Република Конго во март, а четири хуманитарни конвои биле погодени во Украина во текот на една недела во мај.

„Вооружените беспилотни летала станаа ново лице на една стара опасност: намерно или несовесно уништување на цивилни животи“, изјави Флечер.

„Технологијата може да се менува, но законите на војната не се менуваат.“