Пациентите во Газа се соочуваат со недостиг на лекови поради нехуманата израелска блокада

СКОПЈЕ (АА) - Илјадници Палестинци со хронични и тешки заболувања, меѓу кои и пациенти со бубрежна слабост, се соочуваат со „бавна смрт“ под продолжената и нехумана израелска блокада на Појасот Газа, јавува Анадолу.

Во болницата „Ал-Акса“ во Деир ал-Балах, во централниот дел на Газа, пациентите со бубрежна инсуфициенција се најдоа во животозагрозувачка состојба поради критичен недостиг на неопходни лекови, соопштуваат болнички извори.

Давањето на неопходната терапија е целосно прекинато бидејќи болницата останала без еритропоетин – хормон од суштинско значење за стимулирање на производството на црвени крвни зрнца.

Од почетокот на израелскиот геноцид во Газа, испораките на клучни лекови до болницата се прекинати. Лекарите предупредуваат дека ако продолжи блокадата, животите на пациентите се во непосредна опасност, со можни тешки и потенцијално фатални компликации.

Од октомври 2023 година во израелските напади врз Газа се убиени речиси 70.000 Палестинци, повеќето од нив жени и деца, а околу 171.000 се повредени, оставајќи голем дел од енклавата во урнатини.

Во текот на изминатите две години Израел, исто така, ги напаѓаше болниците, здравствените установи и медицинскиот персонал, извршувајќи нови воени злосторства покрај постојните.

Овие напади, исто така, ги прекинаа испораките на лекови и медицински потрошен материјал, оставајќи милиони Палестинци без пристап до третман за хронични и акутни болести.

Според договорот за прекин на огнот што стапи на сила на 10 октомври, Израел требаше повторно да ги отвори премините во Газа и да дозволи влез на основни резерви и лекови, но не ги исполни своите обврски според договорот и покрај повторените апели од Палестинците.