Активистката Грета Тунберг ја одби наградата за животна средина

СТОКХОЛМ

Активистката Грета Тунберг (16) ја одби наградата за борбата за заштита на животната средина, која ја доделува Нордискиот совет, пренесува Anadolu Agency (AA).

Весникот „Сандеј морнинг хјералд“ (The Sunday Morning Herald) јавува дека Тунберг порачала оти ѝ е чест за наградата, но дека на борбата против климатските промени не ѝ треба признание.

Тунберг на социјалните мрежи соопшти дека ја одбила наградата, чија вредност изнесува 75.000 долари, истакнувајќи дека наместо убавите зборови, потребно е да се преземат конкретни чекори.

Грета Тунберг порача дека е потребно политичарите и оние што имаат моќ, да започнат да размислуваат за научните факти и да дејствуваат.

Таа ги критикуваше и властите на нордиските земји што и покрај репутацијата која ја имаат не преземаат доволно чекори, кога станува збор за борбата против климатските промени.

Жирито сметаше дека Грета Тунберг е вистинскиот избор за доделување на наградата, истакнувајќи дека таа е новиот зрак кога станува збор за животната средина и борбата против климатските промени.