Венецуела обвини 4 опозициски пратеници за предавство

АНКАРА (АА) - Врховниот суд за правда во Венецуела отвори кривични истраги против четворица опозициски пратеници, обвинувајќи ги за предавство и поттикнување граѓански бунт, јавува Агенција Анадолија (АА).

Овој потег следуваше откако Националното конститутивно собрание, предводено од страна на претседателот Николас Мадуро, го укина имунитетот на Хорхе Милјан, Хернан Алеман, Карлос Лозано и Луис Стефанели, отворајќи го патот за правни постапки.

Во соопштението на Врховниот суд за правда на Венецуела се вели дека случаите се отворени по барање на јавниот обвинител Тарек Вилијам Сааб, кој ги обвини пратениците за заговор за заплена на воени инсталации во североисточната држава Сукре.

Опозициските пратеници ќе се соочат со обвиненија за „предавство, заговор, поттикнување бунт, граѓански бунт, организиран криминал, узурпација на функции, јавен поттик за непочитување на законите и континуирана омраза“, се вели во соопштението.

Хуан Гваидо, лидер на Националното собрание предводено од опозицијата, го осуди овој потег како уште еден „прогон од страна на диктатурата“ со цел преземање на единствената институција која не е под контрола на Мадуро.

Од почетокот на годината, во Венецуела владеат политички немири, бидејќи Мадуро и Гваидо се вклучија во битка за моќ, додека економијата на земјата е во остар пад, по глобалниот пад на цената на суровата нафта.