Високиот претставник на ЕУ, Борел: „За Авганистан треба да дејствуваме брзо“

БРИСЕЛ (АА) - Високиот претставник на ЕУ за надворешна политика и безбедност, Жозеп Борел, изјави дека ситуацијата во Авганистан е пред колапс и дека е потребна итна акција, јавува Агенција Анадолија (АА).

Министрите за развој на ЕУ одржаа неформален состанок за Авганистан преку видеоконференција на која учествуваше и Борел.

„Хуманитарната и социоекономската ситуација во Авганистан е пред колапс. Според Норвешкиот совет за бегалци, ако не добијат соодветна помош најмалку 1 милион деца се изложени на ризик да умрат од студ и глад оваа зима. Не можеме да чекаме. Треба да дејствуваме брзо“, порача Борел на состанокот.

Наведувајќи дека министрите разговарале за конкретни начини како ЕУ ​​да ја зголеми поддршката за авганистанскиот народ, Борел нагласи:

„Ова не значи дека петте критериуми усвоени од Советот веќе не се валидни. Напротив, тие остануваат валидни и мора да бидат целосно исполнети за да продолжи развојот на соработката која е утврдена.“

Високиот претставник на ЕУ претходно рече дека однесувањето на талибанците ќе го оценат според пет критериуми: „Да не извезуваат тероризам во други земји, да ги почитува правата на жените и човековите права, владеењето на правото и слободата на медиумите, да го олеснуваат доставувањето хуманитарна помош, да им дозволат на странските државјани и на Авганистанците кои се под ризик да ја напуштат земјата и формирање на инклузивна и преодна влада преку преговори меѓу политичките сили во Авганистан.“