Владата на Израел донесе одлука за затворање на телевизијата Ал Џезира

ТЕЛ АВИВ (АА) - Израелската Влада денес донесе едногласан одлука за затворање на канцелариите на телевизијата Ал Џезира во Израел, известува Анадолу.

Израелскиот премиер Бенјамин Нетанјаху рече дека неговата Влада одлучила да ја затвори Ал Џезира во Израел.

Минатиот месец, израелскиот Кнесет (парламент) усвои закон со кој се дозволува затворање на странски телевизии, вклучувајќи ја и Ал Џезира.

Според законот, министерот за комуникации има овластување да затвори странски медиумски куќи кои делуваат во Израел и да ја заплени нивната опрема доколку министерот за одбрана утврди дека нивното емитување претставува реална закана по безбедноста на државата.

„Нашите наредби веднаш ќе стапат во сила“, рече министерот за комуникации Шломо Кархи откако ја потпиша наредбата за затворање на каналот Ал Џезира.

Тој во својата изјава истакна: „Измина премногу време и имаше премногу непотребни законски препреки за конечно да се запре добро подмачканата поттикнувачка машина Ал Џезира, која ѝ штети на безбедноста на државата“.

Ал Џезира има канцеларија во Израел и тим на дописници кои работат во текот на целата година, вклучувајќи и покривањето на израелските напади на Појасот Газа во кои од 7. октомври минатата година досега се убиени повеќе од 34.600 Палестинци.