Во израелските затвори починаа двајца Палестинци

РАМАЛА (АА) - Двајца палестински затвореници починаа во израелските затвори, пренесува Анадолу.

Во заедничко соопштение, палестинската Комисија за притвореници и Здружението на палестински затвореници ја потврдија смртта на Самих Аливи (61) од Наблус на окупираниот Западен Брег и Анвар Аслим (44) од Газа.

Аливи, кој се наоѓаше во административен притвор од 21 октомври 2023 година, починал на 6 ноември 2024 година, шест дена откако е префрлен од затворската клиника Рамла во израелската болница Савероф.

Аслим, пак, починал вчера. Здравјето му се влошило при трансферот од затворот во Негев во болницата Сорока.

Палестинските групи упатија критики за смртните случаи, нарекувајќи ги дел од „поширока, систематска политика за бавна смрт и злоупотреба од страна на израелскиот затворски систем“.

Хамас, исто така, упати критики за смртните случаи, за кои рече дека се одраз на „зголемените злосторства на Израел против палестинските затвореници“ и продолжување на политика за „бавна смрт“

Тој побара итно дејствување за заштита на палестинските затвореници во израелските затвори од понатамошно нивно наштетување.

Смртта на Аливи и Аслим го зголемува познатиот број палестински затвореници кои починале во израелски притвор од 1967 година наваму, додека идентитетот и причината за смртта на десетици други не се откриваат од израелските власти.

Од 7 октомври 2023 година, според палестинските институции, најмалку 43 затвореници починале во израелските затвори.

Од почетокот на ноември, во израелски притвор има над 10.200 палестински затвореници, а многу други од Газа под непознати околности се исчезнати.

Израел ја продолжи својата разорна офанзива врз Газа по прекуграничниот напад на Хамас на 7 октомври 2023 година. Во нападите досега загинати се над 43.700 луѓе, а енклавата е направена непогодна за живеење.

Израел се соочува со случај за геноцид пред Меѓународниот суд на правдата за неговите постапки во Газа.