Германската министерка за одбрана поднесе оставка поради критиките

БЕРЛИН (АА) - Германската министерка за одбрана, Кристин Ламбрехт, денес поднесе оставка по серијата неуспеси, и остри политички пресвртници кои го зголемија притисокот врз Владата, јавува Агенција Анадолија (АА).

Ламбрехт за германската новинска агенција ДПА изјави дека оставката ја доставила до канцеларот Олаф Шолц.

„Со повеќемесечниот фокус на медиумите на мене едвај се дозволуваше фактичко известување и дебата за Германските вооружени сили (Бундесвер) и одлуките за безбедносната политика“, рече таа во нејзината изјава.

„Вредната работа на војниците и многуте луѓе во мојот оддел мора да биде во преден план. Затоа решив да ја ставам мојата канцеларија на располагање“, додаде таа.

Ламбрехт беше нашироко критикувана од опозициските партии за неуспехот да покаже лидерство, за занемарување на тешките проблеми на Вооружените сили и за бавноста со испораката на оружје за Украина.

Социјалдемократската политичарка на почетокот на месецот беше под жестоки критики откако го објави новогодишниот говор на социјалните мрежи, што беше снимен за време на прославите во Берлин.

„Среде Европа беснее војна“, рече таа со звукот на огнометот во заднина.

Германските опозициски политичари и експерти за одбрана го нарекоа видеото „срамно“, барајќи од министерката за одбрана да се повлече.