Германскиот гигант од одбранбената индустрија доби рекордна нарачка за муниција од 9 милијарди долари

ЛОНДОН (АА) - Технолошката групација Рајнметал со седиште во Дизелдорф доби рекордна нарачка од 9 милијарди долари за набавка на муниција од германските вооружени сили, соопшти компанијата денес, јавува Анадолу.

Групацијата соопшти дека добила договор од Бундесверот (Германските вооружени сили) за испорака на артилериска муниција од 155 милиметри во вредност од 8,5 милијарди евра (9,09 милијарди долари).

Договорот е потпишан вчера од страна на Анет Ленигк-Емден, шеф на Федералната канцеларија за инвентар на Бундесверот, информатичка технологија и поддршка во службата, и претставници на Рајнметал во Кобленц во седиштето на канцеларијата.

„Главната цел на набавката е да се надополнат залихите на Бундесверот и неговите сојузници, како и да се обезбеди поддршка на Украина во нејзината одбранбена кампања“, се вели во соопштението.

Примарниот купувач ќе биде Германија, која ќе обезбеди дел од испораките за Украина, но партнерите, Холандија, Естонија и Данска, исто така, учествуваат во нарачката, според групацијата.

Рајнметал додаде дека испораките треба да започнат на почетокот на 2025 година.

Изразувајќи задоволство поради нарачката, досега најголема во историјата на компанијата, Армин Папергер, претседател на Извршниот одбор на Рајнметал АГ, изјави: „Овој договор ја истакнува водечката улога на Рајнметал како добавувач на муниција во Германија и нашата позиција како најголемиот светски производител на артилериска муниција.“