Грција планира постојана база за дронови на островот Родос

Грција планира да воспостави постојана база за дронови на островот Родос во јужниот дел на Егејското Море, објавија локалните медиуми денес, пренесува Анадолу.

Планот вклучува изградба на фиксна инфраструктура на аеродромот Марица за дронови V-BAT како дел од големата надградба на одбранбената инфраструктура и оперативните капацитети на Грција во стратегиски важните Додеканези, објави весникот „То Вима“.

„Одлуката доаѓа во услови на обновени тензии во грчко-турските односи“, објави весникот.

„То Вима“ објави дека дроновите V-BAT претходно работеле главно од привремени, импровизирани позиции низ островите.

Потребата за „проширени мисии за надзор, собирање разузнавачки информации во реално време и безбедна техничка поддршка“ доведе до одлуката за формирање постојан и целосно организиран објект за поддршка на историскиот аеродром Марица на Родос, објави весникот.