Ердоган разговараше со Зеленски, предложи меѓународна истрага за експлозијата на браната „Каховка“

АНКАРА (АА) - Претседателот на Туркије, Реџеп Таип Ердоган, телефонски разговараше со претседателот на Украина, Владимир Зеленски, и во текот на разговорот предложи формирање меѓународна комисија за истрага на експлозијата на браната „Каховка“, јавува Анадолу.

Во соопштението од Канцеларијата за комуникации на Претседателството на Туркије се наведува дека Ердоган и Зеленски разговарале за украинско-руската војна.

За време на разговорот претседателот Ердоган изјави дека би можело да се формира комисија во која ќе бидат вклучени експерти од завојуваните страни, Обединетите нации и меѓународната заедница, вклучително и Туркије, за детална истрага за експлозијата на браната „Каховка“.

Наведувајќи дека како Туркије се подготвени да дадат сѐ од себе во овој поглед, претседателот Ердоган рече и дека може да се следи методот на преговори како во случајот со коридорот за транспорт на жито.

Ердоган истакна дека нема да биде можно да се спречат хуманитарните загуби што се случуваат секој ден додека продолжуваат конфликтите и затоа треба да доминира идејата за враќање на преговорите.

Ердоган изјави дека одлучно ќе продолжи со напорите за воспоставување праведен мир.