Necva Taştan Sevinç
23 Март 2026•Ажурирај: 23 Март 2026
ИСТАНБУЛ (АА) – Европската Унија (ЕУ) денес ја поздрави одлуката на американскиот претседател Доналд Трамп за привремен прекин на нападите врз енергетската инфраструктура на Иран, нагласувајќи дека секој чин на воздржаност е добредојден, јавува Анадолу.
Говорејќи на брифинг за новинарите во Европската комисија, портпаролот Ануар ел Ануни изјави дека блокот ги поддржува сите напори насочени кон намалување на тензиите на Блискиот Исток.
„Би потсетил на она што го изјавија нашите лидери, јасен повик за деескалација и максимална воздржаност. Затоа, секој израз на воздржаност е добредојден“, рече Ел Ануни.
Тој посочи дека ЕУ останува активно ангажирана дипломатски со регионалните и меѓународните партнери за да се спречи понатамошна ескалација, истакнувајќи ги тековните контакти со клучните актери, вклучувајќи ги Иран и земјите од Персискиот Залив.
Портпаролот нагласи дека шефицата на европската дипломатија, Каја Калас, е во „постојан контакт“ со своите колеги од регионот, вклучително и со оние од Турција, Катар и Иран, како дел од напорите за смирување на кризата и промовирање на дијалогот.
Американскиот претседателот Трамп денес објави дека наредил петдневно одложување на сите воени напади врз иранските електрани и енергетска инфраструктура, наведувајќи ги како причина „многу добрите и продуктивни“ преговори со Техеран во текот на изминатиот викенд.
Американско-израелските напади врз Иран започнаа на 28 февруари и, според извештаите, во нив досега се убиени најмалку 1.300 луѓе, меѓу кои и тогашниот врховен лидер, ајатолахот Али Хамнеи.
Иран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив каде што се наоѓаат американски воени бази.
