Заливските земји повикуваат на итен прекин на огнот

ДОХА (АА) - Советот за соработка во Заливот (ССЗ) ги осуди нападите на Израел врз Појасот Газа и повика на итен прекин на огнот, известува Анадолу.

Во Ријад, главниот град на Саудиска Арабија, се одржа состанок на министрите за надворешни работи на Советот за соработка во Заливот (ССЗ).

На собирот присуствуваа и официјални претставници на Обединетите Арапски Емирати (ОАЕ), Кувајт, Оман, Катар и Бахреин.

Во завршната декларација осудени се израелските напади што започнаа на 7 октомври и побарани се итни мерки за да се обезбеди итен прекин на огнот во Газа и безбедно да се достави хуманитарна помош во регионот.

Во декларацијата, исто така, се наведува дека ниедна страна, освен Саудиска Арабија и Кувајт, нема никакво право на полето со гас Дура, кое се наоѓа во Персискиот Залив и откриено е во 1967 година, при што се нагласува дека „сопственоста над ресурсите на тоа поле им припаѓа само на Кувајт и Саудиска Арабија“.

Палестинското Министерство за здравство во неделата објави дека бројот на убиени Палестинци во израелските напади врз Газа изнесува 30.410.