Западен Брег: Израелските сили убија Палестинка и дете

РАМАЛА (АА) - Палестинка и дете се убиени од израелските војници денес во Тулкарем на Западниот Брег, соопшти Министерството за здравство, јавува Анадолу.

Наведено е дека се ранети уште четири лица. Според очевидци, израелските сили извршиле рација во бегалскиот камп Нур Шамс во Тулкарем.

„Израелските сили бомбардираа куќа во близина на мојата куќа“, изјави Камал Ахмед Џабер за Анадолу.

Тој истакна дека се слушнале истрели.

Тензиите се високи низ Западниот Брег откако Израел ја започна смртоносната воена офанзива врз Појасот Газа по прекуграничниот напад на Хамас на 7 октомври.

Според Министерството за здравство, најмалку 554 Палестинци, меѓу кои 133 деца, се убиени оттогаш, а околу 5.300 се ранети од оган на израелската војска на окупираната територија.

Израел е обвинет за геноцид пред Меѓународниот суд на правдата, чија последна пресуда им нареди на израелските власти веднаш да ја прекинат воената операција во јужниот град Рафа.