Унгарија го презеде ротирачкото претседавање со ЕУ на 6 месеци

АНКАРА (АА) - Унгарија денес го презеде ротирачкото претседавање со Европската Унија на шест месеци, преземајќи го кормилото од Белгија, соопшти земјата, јавува Анадолу.

Унгарија го постави мотото на своето претседавање „Направи ја Европа повторно голема“, со цел да ја нагласи „силата на единството и проактивниот пристап кон глобалните предизвици“, нагласи унгарското претседателство на платформата X. Мотото е слично на она на поранешниот американски претседател Доналд Трамп - сојузник на премиерот Виктор Орбан - „Направете ја Америка повторно голема“.

Ставајќи ја Рубиковата коцка – создадена од унгарскиот професор Ерно Рубик – во своето лого, во соопштението се наведува дека познатата логичка играчка „ја претставува унгарската генијалност и сложеноста на европските работи“.

„Рубиковата коцка е составена од 27 елементи, ист број како и бројот на земјите членки на ЕУ“, се вели во соопштението.

„Иако често размислуваме на многу различни начини, коцката, откако ќе се реши, ни дава можност да го видиме и европското единство и волјата и интересите на земјите членки и нациите во исто време“, се додава.

Унгарското претседавање со ЕУ, предводено од премиерот Орбан, коинцидира со преобликувањето на раководството на ЕУ по изборите за Европскиот парламент од 6 до 9 јуни, на кои голем успех постигнаа десничарите.

Така, иако не се очекува динамичен легислативен процес, политичката визија на Будимпешта се очекува да има голема тежина.

Во последните години имаше тензии меѓу унгарската Влада и раководството на ЕУ поради, како што се наведуваше, пад на демократските принципи во земјата.

Против земјата се води правен процес со образложение дека го прекршува законот на Блокот, а значителен дел од сумата што Унгарија би можела да ја добие од фондовите на ЕУ е блокирана поради оваа причина.

Унгарија ќе го предаде претседавањето на Полска на 1 јануари следната година, бидејќи земјите членки го менуваат претседавањето со Унијата на секои шест месеци.