Зеленски во Канада на разговори за противвоздушната одбрана на Украина и подготовките за зимата

Украинскиот претседател Владимир Зеленски денес изјави дека пристигнал во Канада за разговори фокусирани на противвоздушната одбрана и подготовките за претстојната зима, пренесува Анадолу.

Во објавата на американската платформа на социјални мрежи X, Зеленски истакна дека Канада била и останува еден од најблиските партнери на Украина и дека се планирани важни средби и договори, вклучително и со премиерот Марк Карни, кои ќе ја обликуваат билатералната соработка и ќе го зацврстат веќе постојното стратегиско ниво на нивните односи.

„Главниот фокус ќе биде на поддршката за Украина во заштитата на нашето небо и подготовките за зимата. Ќе разговараме за тоа како да го зајакнеме нашиот отпор, да го поддржиме нашиот народ и да обезбедиме Украина да ги има капацитетите неопходни за одбрана“, рече Зеленски.

Тој напомена дека и првата дама Олена Зеленска ќе учествува на настани во Канада, меѓу кои и на планираната средба со „филантропи што ја поддржуваат Украина“.

Посетата на украинскиот претседател се реализира по неговиот престој во Норвешка, каде што вчера присуствуваше на церемонија посветена на покојниот крал Харалд Петти.

Зеленски на пат кон Канада се сретна со исландската министерка за надворешни работи, Торгердур Катрин Гунарсдотир, на меѓународниот аеродром „Кефлавик“.