Зеленски: Европа обединета во потребата од вистински мир и безбедносни гаранции за Украина

ИСТАНБУЛ (АА) – Украинскиот претседател Владимир Зеленски истакна дека Европа е обединета околу потребата од вистински мир и безбедносни гаранции за Киев, јавува Анадолу.

„Постои јасна поддршка од Европа. Дури уште поголемо единство, уште посилна подготвеност за соработка“, рече Зеленски во синоќешното видеообраќање по самитот со европските лидери во Лондон.

„Сите се обединети за главната цел – за мирот да биде реален, потребни се вистински безбедносни гаранции. И ова е позицијата на цела наша Европа – на целиот континент. Велика Британија, Европската Унија, Норвешка, Туркије.“

Зеленски рече дека ќе има многу други состаноци и заеднички активности во наредните денови и недели.

„Ќе има дипломатија за мир. И за доброто на сите нас заедно – Украина, цела Европа и Америка“, додаде тој.

Нагласи дека Европа ќе ги обликува своите заеднички ставови во блиска иднина, кои потоа ќе бидат претставени пред партнерите во Соединетите Американски Држави (САД).

За досегашната поддршка на САД, тој рече: „Немало ниту еден ден, а да не сме се чувствувале благодарни. Затоа што тоа е благодарност за зачувувањето на нашата независност: нашата отпорност во Украина е изградена врз она што нашите партнери го прават за нас и за нивната сопствена безбедност“.

„Силен и траен мир, и правилниот договор за крајот на војната се навистина наш заеднички приоритет“, додаде тој.

Самитот, чиј домаќин беше британскиот премиер Кир Стармер, а на кој присуствуваа многу европски лидери, се одржа по расправијата меѓу Зеленски и американскиот претседател Доналд Трамп и потпретседателот Џеј Ди Венс во Белата куќа.

Зеленски изрази сомневање дека дипломатијата може да резултира со мир, а Трамп и Венс го критикуваа украинскиот лидер дека не е благодарен за американската поддршка.

Церемонијата на потпишување на договорот за минералните ресурси и прес-конференцијата потоа беа откажани, а Зеленски ја напушти Белата куќа.

На состанокот во Лондон, Стармер ги претстави плановите за создавање „коалиција на волните“ за спроведување на мировен договор во Украина.

Тој нагласи дека Велика Британија и Франција ќе подготват мировен план што ќе му го претстават на Трамп.